Fitz > 運動 Sports > 行山 Hiking > 神啊! 請睇實鹹田灣!
wKgB21AZqhL16bw9AAFy2w_K6s833.groupinfo.w600
前面係鹹田灣,遠少少嗰個係大灣

報章報道,話有漁護署高官向政府申請,喺鹹田灣嘅鹹田村興建五幢住宅。早兩年,隔離嘅大浪西灣已被某富商靜靜雞起咗幢花園豪宅,而家又再搞鹹田灣!有團體就發起聯署運動,希望可以喺三月廿七日諮詢限期前提交反對意見。(按:團體以「反對大浪灣丁屋申請」為號召,好多人以為講緊大浪西灣。原來大浪灣主要包括四個海灘,即西灣、鹹田、大灣及東灣)

Ham-Tin-overlay-3

聯署簽名網址
http://www.designinghongkong.com/forms/view.php?id=30391

一講西貢最靚嘅海灘,唔少人所揀嘅,唔係浪茄,就係大浪西。呢兩個海灘固然水清沙幼兼且一望無際,而且亦唔算偏僻,只需步行一個鐘之內。不過,我山雞嘅首選就係鹹田灣。

講位置,鹹田灣可以話相當偏僻。無論由西灣亭起步,還是由北潭凹起步,一般人都至少要行兩個鐘以上。而且,因為沙灘面積較細,所以通常泳客(來自西灣亭或遊艇)都會選擇大浪西或浪茄,令鹹田灣除咗長假期有人露營,毅行者前有人操山外,基本上相當清靜。

aG5dd5GB.vCEw0dB0.nDPA
海風士多及鹹田灣獨有之小橋流水

鹹水灣最大特色,就係佢嘅小橋流水,可說係全港海灘獨有。據該處嘅海風士多老闆所講,呢條橋係佢哋一手一腳興建及維護,以方便遊人唔使兜路,可直入村折回麥理浩徑(當然亦方便去佢哋去士多食嘢)。而呢間海風士多,更成為露營行人山士重要補給中心。(我極力推介星洲炒米!)山雞以前經常去鹹田紥營,只帶乾糧,正餐就以海風士多作為飯堂。更試過露營遇上颱風,就係靠士多對出嘅帆布頂救我哋一命。

鹹田起住宅,我山雞第一個反對。撇除民間團體所強調嘅保育理由外,我只係想指出,鹹田灣交通極為不便。海風士多老闆話過,佢哋啲貨物係要由西貢碼頭,用艇仔運到海灘對出,再好似諾曼第登陸咁,人同貨物要澗水衝上沙灘。加上鹹田村丟空咁多年,村民話要喺呢到起丁屋,佢哋係咪真諗搬入去住?定係起好間屋之後又要求起路?還是用嚟出租當酒店?總之,呢幾幢住宅,就成為破壞整個郊野嘅一個缺口。之前大浪西灣已告失守,呢次鹹田灣不容再失。

幾幢樓只係為左幾十人嘅利益(根本唔講得係需要,佢哋咁等屋住大可以起喺第二度),但破壞一片郊野地方,就影響咗幾千幾萬人嘅需要。更可怕係,破壞咗就唔可以復原。

往鹹田灣路線:

  1. 坐的士(或村巴)西灣亭(即吹筒坳)下車,下山接麥理浩徑落大浪西灣。再由西灣左手邊往鹹田灣。
  2. 坐黃石碼頭巴士在北潭凹下車,在公廁側進入麥理浩徑,逆行第二段落赤徑,經大浪凹到鹹田灣。

更多:
告急! 大興土木 釣魚翁危在旦夕
山雞其他文章
Fitz行山文章


文章為作者意見,不代表Fitz立場。