Fitz > 運動 Sports > 跑步 Running > 我的馬拉松 — 記大阪初馬 (六)

我的馬拉松_003

當時,我仍然堅決比賽前,最好先模擬跑一次全馬路程,以便知道自己完賽時大概時間。

最主要原因,我諗係自己性格問題。我好怕遇到超出預期嘅情況,比如:

如果我約咗人20:00食飯,就算路程只係30分鐘,我都會19:00出門口,為怕途中有咩問題引致遲到⋯

如果唔可以比賽前完成一次全馬路程,我打算頭30K用4小時(因為未試過跑30K,有可能出現抽筋情況,所以預先準備用4小時)。

之後12K,又因為未試過,有可能已經雙腿抽筋幾次,所以預計有3小時慢慢用,應該跑完最後12K。

我知咁嘅計算方法好戇居,但真係未試過跑咁長時間、咁長距離,先會有d咁保守、咁戇居嘅估計…但要用這個戇居嘅方法,都要先試過4小時跑30K,我先會安心,可惜未到30k,我已經受傷了。

經過幾個月嘅操練,過程中多次受傷⋯

最後明白到有好多嘢急唔嚟,唔係想點就點。

其實由7月到8月中,每星期跑50∼55K,自己跑到好累,但嗰陣只是一心儲里數,完全唔理會身體機能同肌肉,已經超出負荷。而且太過着重40歲完成全馬,令到自己身心都疲累了,又一次走進死胡同裡。

休息期間,每每睇到天氣咁正,又心痕痕想跑⋯

見到其他人跑緊,又想去跑…

我知道,我真係喜歡跑步,我希望可以永遠保持呢種心情、心態,去對待每一次跑步嘅機會,不管每次長或短,快定慢。

5個月內,受傷3次,1次比1次嚴重。又一次告訴自己,任何事都要慢慢一步一步嚟,成功無捷徑,要打好基本功才可以逐級而上。傷癒後,經過逐步加量情況下,終於可以以7分半速走完26K 。

第一次真正領悟到LSD的L同S,左膝完全無痛。

領略到L同S的真諦,比第一次上半馬還要激動。

上一篇(第五集)| 下一篇(第七集 結局)

更多:
我的3400米
722其他文章
Fitz跑步文章


文章為作者意見,不代表Fitz立場。