英國嘅「糖稅」就係要打擊呢啲含糖嘅汽水。
英國嘅「糖稅」就係要打擊呢啲含糖嘅汽水。

英國計劃喺兩年後,徵收含糖汽水附加稅 (俗稱「糖稅」),暫時仲未決定收費嘅方法同金額。而英國首相卡梅為呢項法案解畫,話如果唔再阻止呢啲含糖飲品,未來70%嘅5歲以上兒童,都會有癡肥或糖尿病嘅威脅,亦因為呢條法案,英國將可以慳到5億英鎊嘅醫療開支。

對於英國政府嘅決定,最開心嗰個,首推英國「大城小廚」Jamie Oliver。佢就趕不及待喺Twitter留言,話呢個係「profound move」(深刻嘅行動)。

英國收「糖稅」 6個糖份過多的事實 1

事實上,好似Jamie Oliver呢類講求健康嘅人士,呢幾年已經不斷呼籲大家少飲含糖飲品。而英國嘅對面岸美國,係當今世上其中一個最癡肥嘅發達國家,所以呢幾年都好關注呢個問題。美國關注含糖食品嘅組織,就針對美國人,總結咗6個糖份過多嘅事實:

  1. 平均每人每星期吸收765克糖,相等於17罐可樂。
  2. 平均每人每年食咗130磅糖,相等於1,767,900粒Skittles。
  3. 美國心臟協會建議每人每日食糖不多於10茶匙,但一般人嘅每日食糖多過12茶匙。
  4. 汽水佔每日食糖量多達33%。仲有好多隱藏食糖,包括餅乾、調味料 (如茄汁)
  5. 美國人平均每人每年飲53加侖汽水,即係565罐。
  6. 扣除每日嘅所有食糖量,你可以減少吸收500卡路里。
原來大家每年食咗百幾萬粒Skittles
原來大家每年食咗百幾萬粒Skittles

不過更重要嘅係,近年有唔少研究指出,糖不單止有害健康,仲會令人上癮(Sugar Addiction)。英國《每日郵報》1月時曾經刊登醫生Sally Norton嘅文章,指糖係新世代嘅「可卡因」(Sugar ‘is the new crack cocaine’)。Sally引述法國一項研究, 話就算係可卡因上癮嘅老鼠,幾乎每次都會選擇「糖」而非「可卡因」食用,再進一步控制老鼠飲食,刻意將糖嘅份量增加或減少,更發現佢哋出現毒品成癮嘅徵狀。如果大家想知多唥「糖」對人體大腦嘅影響,可以睇下以下TED Ed嘅短片(有中文字幕):

之前Fitz.hk都報導過,荷里活導演Kevin Smith就係用戒糖呢個方法,減咗85磅。就算我哋有無「糖稅」,係咪都應該留意下我哋每日食咗幾多糖呢?

資料來源:The GuardianAlternet

更多:
Fitz.hk Facebook專頁
[真係咁健康?] 極富爭議的Vitaminwater
荷里活大導 憑兩招減85磅
Fitz Diet 飲食