財經雜誌《iMoney》訪問傳染病專家袁國勇教授，有句說話成為網上熱話。佢話：
「進食生的三文魚好似食屎咁！」
呢句說話足以嚇親鍾意食魚生、壽司嘅香港人。
其實，網絡上有唔少講法，都係將袁教授嘅講法歪曲咗。袁教授話三文魚「好似屎」，係因為三文魚所含嘅大腸桿菌，唔少已成為抗藥性。即係話，如果人類受呢啲細菌感染，隨時無藥可醫。
我哋每時每刻都要接觸到唔同細菌，但係極少會影響我哋。而三文魚有菌，亦不足為奇。問題係，呢啲細菌已因為時下人類濫用抗生素，特別係養殖業，將抗生素用於動物身上，製造出大量抗藥性細菌，足以攞人命！
所以，要針對嘅，應該係大家點用抗生素，而唔係將個責任推畀三文魚。如果大家相信袁國勇教授對抗生素問題嘅睇法，咁就應該盡量唔掂任何剌身、壽司，真係要將食物煮熟！
後記：
睇袁教授講三文魚，令我諗起蔡瀾一篇舊文，話：「正統的日本鋪子，絕對不會賣三文魚刺身！」(壹週刊892期)。蔡瀾話野生三文魚因為要到淡水產卵，河流受到污染，三文魚就會生蟲……
蔡瀾係食家，係第一代日本通，佢講呢番說話一定有份量。不過，筆者查證咗好多年，對於日本人係咪唔食三文魚刺身，仍然係無確實證據。究竟日本人係咪唔食三文魚剌身？知道答案請留個言！
總之一句，驚就唔好食，食就唔好驚啦！喺當今世上，危機重重，又邊驚得咁多呢？
更多：
Fitz.hk Facebook專頁
[哈佛研究] 即食麵有幾唔健康?
[例湯過鹹] 食鹽太多致大肚腩?
想讓運動後疲勞提早恢復? 來杯西瓜汁吧!
[流言終結者] 吃素會變胖?
Fitz Diet 飲食
講求綠色、環保、天然的健康生活。推廣新一代健康生活文化。
