做開運動嘅人都會明白一對穩陣而又有返咁上下音質嘅無綫藍牙耳機對運動係幾重要。我喜歡耳機，對音質有一定要求，不過只係平凡的地球人，所以如果你係尊貴嘅音響發燒友，買對耳機要又煲又燉嘅話，我可能比唔到意見你，但如果你喜歡一路聽歌一路做運動，去片！（跳起）
以下係小弟對上三對耳機嘅Portfolio:
- Shure E3c
- Monster Dr.Dre Beats Studio
- Monster iSport Immersion
- Aftershokz Bluez 2
以上四款耳機除咗Aftershokz Bluez 2 完全未達標導致已經消失連渣都無之外，其餘三款都用咗起碼一年或以上，甚至壽終正寢。公平啲講，Aftershokz 嘅特質有佢嘅長處，但並唔係人人合適，起碼我就性格不合因而分手。
今次我會攞我最熟悉而又最接近嘅iSport immersion 作一個比較， 但大家記住，兩款耳機嘅分別係，iSport 賣點係超級防水，甚至有人話放入洗衣機洗都唔會壞，我就唔夠薑去試。 而Adistar 嘅賣點好明顯係無綫藍牙方便、同物料高級。
音質
Pros:
Adistar 嘅音質喺我試過嘅小型入耳式無綫藍牙耳機當中，算係屬於中上。隔音能力高，低音既punch都幾明顯.
Cons:
可能比較注重節奏音質，所以中高音略覺模糊。
音量
Pros:
喺嘈吵鬧市佩戴非常隔音，音量完全冇問題。
Cons:
隔音太厲害對於城市跑手嚟講就要小心，以免產生危險。
舒適度
Pros:
連耳機贈送嘅耳殼支架Sportclips有多個大小調校，非常穩陣，測試時就算chok下chok 都無甩過。
Cons:
可能因為用料包含感覺比較高尚嘅金屬，耳機本身份量比 iSport 等耳機明顯加重，體型較大，雖然測試過程並無甩過，但存在感明顯大咗，亦要時間習慣。
耐用／電量
Pros:
頭先講過耳機用咗金屬物料，令佢比較堅固耐用，萬一跌落地下都唔會散。官方話耳機可以續航5小時，我哋測試截稿前連續開住超過七 小時，仍然堅挺。。。跑個馬拉松完全唔係問題！
Cons:
無綫藍牙耳機始終係內置電，電芯喺多次使用後壽命一定會慢慢減弱，呢方面就好難同有線耳機比較，同時要經常記住要叉電。。。又要叉多樣嘢。。。
其他
Pros:
耳機線長度適中，唔會太長影響運動，亦唔會太短。
耳支架除咗支撐耳殼之外，亦同時保護電線，喺用力chok嘅情況下唔會從耳機扯斷電線。
附送嘅耳機袋兩層布料料相隔，防沙防水性能良好，亦比iSport嘅單層假皮袋明顯高幾皮。
價錢：$890（Price.com.hk)
總結
無論物料，耐用程度同音質，對於一般運動人黎講，都非常達標。唯一係耳機體積比較大，本人身高171，耳窿亦屬於正常大小，佩戴冇問題，但耳仔／耳窿比較細小嘅朋友，如果唔習慣佩戴入耳式耳機，就可能需要更多時間習慣。
更多:
Fitz.hk Facebook專頁
[鉛水都唔驚] 殺菌+過濾 旅行遠足超強水樽
[戶外煮食神器] 無煙無火淥個公仔面!
救命毯可減「低溫症」機會
Fitz.hk Life生活
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。
