最近兩個月一連測試咗幾款越野跑鞋，包括 ON 嘅 Cloudventure Peak，Brooks 嘅 Cascadia12、Caldera 同埋 Hoka 嘅 Challenger ATR3，可謂各有千秋；今篇想同大家分享吓 Challenger ATR3 試鞋報告，由於香港山賽友好多都喺著 Hoka 嘅關係，之前都已經著過 Challenger 第2代嘅山友亦都為數不少，好多人都想八卦吓依代有無d乜嘢大分別，而筆者我亦覺得依個型號好適合玩香港嘅山徑，尤其係比賽方面。
首先好尷尬咁講，我有著開 Hoka，但從未著過 Challenger 依個型號，Hoka 一向俾我的感覺喺跑感舒服，老老實實玩得山賽郁吓最少都一日半日啦，舒適度真係最緊要，速度感就其次，有幾多個阿Tom、阿John、阿聰依類菁英跑手吖，我地一般人著對薄底速度山鞋去比賽真喺揾自己笨啦……
依對 Challenger ATR3 我玩咗差唔多兩個月，唔喺話好多，過百K唔夠百五K，其中第一二課仲喺純路跑測試，一課喺運動場另一課就喺跑街，加埋前後都有三四十公里，測試目的喺因為 Challenger 系列講到明跑路跑山都得，咁我當然試吓啦！試過之後覺得唔喺吹水，雖然著住對白飯魚都可以响街同响山上面跑，無人阻止到你，但依對 ATR3 無可否認確實喺適合跑香港嘅街道，跑果陣時好有一貫路跑鞋嘅感覺，完全唔似著住對山鞋跑街，由於越野鞋嘅鞋釘大多數比較高身同堅硬，鞋釘磨擦面又做得好細緻，而且整個外底都會做到好硬，避免俾d尖石頂腳，所以越野鞋一跑石屎路個感覺就會好鬼怪，磨擦勁得滯有啜腳嘅感覺同埋撞落地下果吓好硬，好唔流暢。
我講到 ATR3 跑街好似路跑鞋咁，我自己都會問自己其實依對 ATR3 會唔會傾向於路跑鞋設計多d，响跑山能力果方面會唔會無咁好，只係簡單應付到呢? 喺唔喺 Hoka 特登整對鞋出嚟撼美津濃 Rider 呢?因為確實好多人專登著住對 Rider 玩山賽，話普通山路應付到之餘石屎平路又爆得兩吓。
我之後著住依對 ATR3 做過三次山路測試，短程中距離長途平坦地複雜地慢速高速乜都試勻，結果喺無乜嘢喎！好似搖身一變就變返對正宗越野鞋咁，基本上噏得出越野鞋所需要嘅都瓣瓣有齊，如果問我缺點，我可能覺得喺落樓梯果吓鞋頭靈活性始終爭少少。
總括嚟講，我第一次著依款型號整體上我覺得喺幾正嘅，最欣賞係舒適度方面，响山徑長時間著住都無乜題，個底夠厚响崎嶇碎石地都無頂腳底嘅感覺，而喺較平坦嘅山路同埋一d石屎路段仲可以提升速度，緩震度非常之夠。
記得最後一次測試依對 ATR3，側邊朋友問我好唔好著，我話算ok啦，佢就話佢之前著過第二代，覺得鞋底d釘好快蝕，玩咗兩三場長距離比賽對鞋就玩完咁滯，之後我都分別問過好多有著過 ATR2 嘅人，佢地大致上都話耐磨度正正常常屬於一般，又未至於最差嘅，keep 住著都起碼玩到一年，最後我直頭問香港 Hoka 果邊，佢地就話ATR3其實就喺針對以上弱點而推出，新一代鞋底已經強化咗，而中足位置仲加強咗承托添~
其中一段小插曲，前排 The 9 Dragons 山賽第二日50K賽事我响城門水塘做緊山鞋實測，咁啱响針山頂就見到前列選手响山腳上緊嚟，離好遠見到其中有條鬼佬無著衫嘅，我就同我側邊朋友講，依個應該係阿John嚟，因為依條友仔比賽十次有九次都唔著衫，我懷疑佢係咪想吸引d品牌贊助比賽衫……上到針頂唔駛問阿貴，喺阿John嚟，見到佢都係著緊 ATR3，睇嚟真喺幾適合香港依d特色路山混合比賽。
最後都好簡單求其補充一d資料，ATR3 香港男裝好似有3隻色，女裝至少都2隻，落差就5mm，前面24後面29，我果對US9號自己拎去磅過約莫250g多d，山鞋叫做幾輕，大部分有賣Hoka嘅舖頭都有賣，例如 Action X，Trail sport+，All Weather 果d都有㗎啦。
更多：
Fitz.hk Facebook專頁
Saucony 跑鞋分類大檢閱
新手揀跑鞋我推薦先做Foot ID
官塘朝偉@Fitz.hk
Fitz Hiking 行山
