Fitz > 生活 Life > [Sportential 運動潛能] Foam Roller=自殘軸 !?

運動員們都好變態,譬如田徑,好多都跑到嘔哂,見到田徑場都驚咁濟,但又會跑好多年喎;長跑/ 跑山人,每次跑完個大賽,成日都話冇下次,但下次又見到佢喺隔離喎;爬石人爬到成牆血,都仲係爬緊;球類更加唔使講,撞到腦震盪,手斷腳斷,都仲係會死返嚟。而呢好幾年,就再興多股怪風—勁多運動員都會有碌自殘軸隨身。

“自我肌筋膜放鬆” (Self-myofascial Release, SMR)
講嘅咪係泡沬軸 (Foam Roller)同埋佢啲週邊產品囉。其實呢碌野,近年好多非運動員都趨之若鶩,講到有病醫病,冇病強身咁。我哋集中講返運動人,喺科學角度上,泡沬軸係十分好。佢其實係一種 “自我肌筋膜放鬆” (Self-myofascial Release, SMR),其中myofascia,就係包著肌肉嘅一層膜。

一個比譬就係,好似香腸層外皮咁。呢樣野係有彈性,但遠遠少過肌肉本身;而且肌肉,會成日因訓練而撕裂,然後再修補,慢慢就會形成”結核” (Nodules);或者肌肉同筋膜之間,會因為疤痕而”癡”著。以上嘅情況都會直接或間接影響運動表現,因為:

  • 肌肉伸延性受阻,增加被動阻力(Passive Resistance)
  • 下降伸延性,導致關節主動及被動活動幅度減少
  • 被動阻力增加,增加某啲運動傷害風險
  • 過多結核,長遠會變成壓痛點(Trigger Points)
  • 由於肌肉缺乏伸延性,會間接影響血液循環及恢復

科學實証,ALL in?
學界亦有好多文章講SMR,但對於SMR嘅生理好處,並未算有好一致嘅定論,不過普遍都係持正面嘅意見。譬如有份美國嘅systematic review,就講到foam roller係有短期嘅活動幅度(ROM)增加效果,亦可能有助於減輕”延遲性肌肉痠痛” (DOMS)。而最重要嘅係,係運動前做一段短時間嘅SMR,係唔會減弱肌肉表現!

聽落都已經覺得好正,仲要有科學支持。但返返嚟地面先,香港嘅運動員都知道,我地一般放學/放工(射波唔計) 先開始練習/比賽。完咗都十點打後。跟著我地再要食飯梳洗又呢又路。好,如果我叫你「拿,你要每日都要碌下丫」我相信你個黑眼圈嘅增長速度絕對會跑贏大市。

並唔係話係香港唔應該做SMR,我十分贊成適量地做,只係預防/恢復嘅方法有好多種,係香港呢個忙到崩潰嘅城市,大家一定要用最高嘅效率做野。學識搵最啱自己嘅方法。而呢個亦都係我哋喺度長篇大論嘅目的。

可以試嘅做法:

  1. 運動後,瞓前做少量
  2. 喺rest day 做,針對主要大肌肉
  3. 如果你好多時間,可以以運動前或者日日做嘅。如果有時間,我會揀做多啲運動專項熱身。

P.S.記住唔係萬能嫁,肌肉拉傷唔好亂嚟丫!!



Reference:
Cheatham SW, Kolber MJ, Cain M, Lee M. The effects of self-myofascial release using a foam roll or roller massager on joint range of motion, muscle recovery, and performance: a systematic review. Int J Sport Phys Ther. 2015;10(6):827–38.

原文載於 Sportential 運動潛能資訊

Sportential 運動潛能資訊 Facebook 專頁

更多:
Fitz.hk Facebook 專頁
[Sportential 運動潛能] 拗柴—韌帶撕裂?!
[物理治療師提提你] 身體關節高危位置
[米奇中醫堂] 扁平足與足底跖筋膜勞損
[傷膝青年特約] 護膝產品用後感
Fitz Life 生活


文章為作者意見,不代表Fitz立場。