Fitz > 運動 Sports > 單車 Cycling > [行貨早享受,淘寶平幾舊!] 內地版Garmin 810 糾偏出奇制勝! (一)

Garmin 810先簡短講下背景,唔想聽我廢噏可以Skip呢段。

小編不嬲係孤寒種,所以喜歡精打細算,將慳到嘅錢用喺更有用嘅地方。同時間我係一個喜歡挑戰同唔怕用功嘅人,所以好怕喺野猴(或同類店)買嘢,因為野猴係比身居要職,事務繁忙嘅人,用錢換安心嘅地方,我唔係,我好休閒同窮,所以我每買一樣單車補品之前,都必先用很多時間做研究,找尋性價比,最平優惠,二手價格同耐用程度等。。。而講到平,呢個宇宙萬變不離淘寶同深水埗電子特賣場。所以當小弟決定為自己添置一部Garmin 單車GPS/導航/訓練儀/速度儀 你鍾意叫佢乜都好,最後都走咗去淘寶,而呢段經歷令我學到不少,而家教你。

首先如果你係未買Garmin GPS產品,你先要知道的事。

  1. 中港澳所有Garmin 1000/810/510 主機,基本上都係產自台灣,所以都係台灣機。而三種行機都可以選擇繁體簡體或英文。
  2. 港行版程式跟港澳地圖,台灣版裏面跟台灣地圖,而中國版。。。跟一個偏移中國地圖。
  3. 中國大陸on9制度,規定所有GPS儀器都必須將接收到嘅國內定位訊息,一路向西偏移大約600米,目的係為咗打亂美國情報,原理就同港女化妝易容,將個鼻打陰影打到做大戲咁,以為你坐係面前兜口兜面望住唔會知道佢個鼻有幾扁咁。掩耳盜鈴之作。
  4. 港行機810套裝有香港樓上舖賣緊最平3200HKD,而國行機喺淘寶標價2980人仔,對返港紙要成3686HKD
Garmin 810
港版 ¥2080

淘寶的Garmin 810:

照咁講咪淘寶國行貴過港行?!此言差矣(背著TVB鏡頭向著窗口外面一棵樹講),作為一個有少許生意頭腦,明白物流運作嘅人,都唔會相信喺淘寶買嘢會貴過喺香港鋪頭買,所以經我深入淺出明查暗訪,卒之比我查到,通常淘寶上面賣嘅Garmin510/810會有兩個選擇,1)國行正品套裝,2)港行套裝。而港行套裝竟然出奇地只售2080RMB,即係2572HKD,比喺香港買足足平咗六百幾蚊!

點解呢?!我見個客服又係囡囡,就決定用我三吋不爛之舌,查個究竟。最後囡囡招供,佢話 『亲,其实边有咁多港行货丫,放港行选择上去,无非系为咗安抚中国代理商果边,因为如果直接将国行机标价$2080 代理商就会向佢发警告信,话佢定价过低。所以就会用港行价钱做招徕,卖国行机罗!』

所以喺淘寶買嘢,千祈唔好直接俾錢,要習慣同客服先溝通。

Garmin 810
國行正品套裝 ¥2980

言歸正傳,所以小弟就計劃要慳返六百幾蚊,以2572 HKD 嘅價錢,買國行Garmin 810。

講到呢度,抖一抖先,因為以下落嚟嘅嘢係好繁複。

問題嚟嘞,因為中國制度問題,GPS信息會偏移600米,作為一個導航系統,無理由偏移600米咖~!所以Garmin索性將個地圖上嘅資料一併偏移,等你望上去準確,明唔明?

簡單一個例子,你明明係女人,但身材似男人,所以你為咗唔好俾人以為你入女廁及嘢,所以索性隆胸,將自己整到似返一個女人,明未?

本來咁樣都無問題,因為雖然係假,但係望落好睇正常咪得囉,點知落咗嚟香港,問題就嚟啦,你突然間開始發育,喺假胸旁邊生返兩個胸出嚟。。。而家人唔似人鬼唔似鬼,點算!

係有少少誇張,戴番個頭盔先,純粹幻想,無意羞辱女性。

Garmin 國行機就有呢個問題嘞,好明顯一國兩制,當中國GPS儀器落到嚟香港,600米偏移限制就會解除。。。咁本來糾正咗嘅地圖(下稱糾偏地圖)就會矯枉過正。。。落咗海。。。情況如下。

Garmin 810咁點解決呢? 實不相瞞,如果我唔係有挑戰心,如果我唔係修讀地理資料系統畢業,我可能會轉身走去野猴。但我係,所以我決定爆Seed,挑戰佢!

講到呢度,去一去廣告,下星期待續。。。

更多:
內地版Garmin 810 糾偏出奇制勝! (二)
那年秋天,我以15萬買回我的鎖骨
Fitz單車文章


文章為作者意見,不代表Fitz立場。