Updates


[日本四國單車環島] DAY 8 須崎市至高知市

Day8 – 38km 總距離496km
須崎市 – 高知市

琴晚講到成功搵到個好好人既司機,車我地到須崎市。放低左我地係間便利店,之後距離酒店只係淨返3km,於是我地拿拿臨踩埋3km去到酒店,因為真係好凍😔點知,踩左400m都唔夠,再一次爆軚,真心講左粗口出黎,2日內爆3條軚,真心灰到世界既盡頭,後備軚已經用曬,擔心左成晚,唔知附近有冇得整單車,問左酒店職員,佢話附近有2個地方整單車,但因為聽日(1月9日 – 日本成人禮紀念日公眾假期),唔知鋪頭開唔開。最壞打算想搭JR去高知市,但因為JR唔比乘載單車,又少左一個解決方法。

直到朝早,離開酒店出發去搵地方整單車,沿途經過間超級市場,見到有賣單車,即刻衝入去睇下有冇得整,點知真係有,真係好好彩。搞左一大輪,先發現冇我架單車適用既軚,又再一次頹左。店員已經係咁幫我搵有冇其他地方有配件,最近既地方都要25km外既高知市。當走投無路既時候,店員收到個電話,竟然話附近有間鋪頭有我適合既軚,真係勁勁勁好彩,仲要係唯一一條。佢即刻9秒9幫我踩單車衝出去買,果一刻再一次好感恩,依個旅程每次去到最後一刻都好好彩。



最後終於順利去到高知市

沿路仲見到我人生中最靚既一條彩虹,成個畫面好似畫畫出黎一樣。完整既一條彩虹出現係我面前,即刻有種雨過天晴既感覺。入到高知市,見返城市既感覺真係好好。

去到夜晚,另一個問題又出現,我地行程延長到1月13號,但係上網卡只係去到1月10號,好彩最後都搵到有離線地圖幫手。

「行到水窮處,坐看雲起時」

The following two tabs change content below.
徐匯宗

徐匯宗

全名徐匯宗,年齡 22,路跑跑齡: 8年。越野山賽: 零經驗。主要參加項目: 10K,半馬。渣馬2017將會初次參加全馬,目標sub3
Get Moving