Photo: WLCreative
Photo: WLCreative

星期日,5月24日,經過前一日嘅紅色暴雨之後,朝早天氣雖唔算藍天白雲,但係天色明朗。唔少屈咗喺屋企一日嘅朋友,當堂蠢蠢欲動,上山下海去也……

但係,到下晝四點幾,天文台發出警報,天氣將會變壞,期後發出黃雨警報。即時新聞網,更傳來令人擔心嘅消息:「麥徑第四段有行山友被雷擊中,需要消防員救落山……」

但願呢幾位行山友可吉人天相。

我都明白,呢兩日長假期,天氣咁差大家要留喺屋企真係好委屈,天文台雖然預測天氣不穩定,但係星期日朝早天氣好轉,唔少人就搏一搏上山。結果,就遇正雷雨。

右下角顯示過去一個鐘嘅閃電位置。要預測閃電嘅地點,而家科技係做唔到。
右下角顯示過去一個鐘嘅閃電位置。要預測閃電嘅地點,而家科技係做唔到。

以而家嘅科技,要確切預測行雷閃電嘅位置完全唔可能。天文台嘅閃電位置圖,只係統計過去閃電嘅位置。所以,當天文台發出雷電警報(屬全港性),就係大概話畀大家知喺香港境內會有閃電,絕對唔好抱住搏下嘅心態囉。

行山突然行雷閃電,可以點做?

1. 附近有建築物就去嗰度匿埋,就算關咗門嘅建築物,入唔到去都可以喺出面匿。
2. 離開山頂或高處,盡量往下走;
3. 雷電會找尋最高地方傳電,所以附近如有高樹或電纜,要立即離開;
4. 遠離金屬物體,如鐵欄、天線、水管等金屬物體
5. 電流會沿導電體傳到地面。若地面有水(雷電大多數會有雨),千祈唔好訓或坐喺地下。
6. 如在空曠地方,身體盡量踎低,並將身上嘅金屬物品除低。
7. 熄電話 (呢個未必有科學根據,但寧可信其有。況且,check少陣WhatsApp唔得咩?)
8. 喺海上或河流,第一時間上岸。

資料:漁護處

同場加映:《暴雨來了,要學懂看雷達圖》行雷閃電小心出事_003

同係行山友嘅區家麟先生,早前有篇文章教人睇雷達圖。小弟受益匪淺。趁呢排天氣仲係不穩定,特意推薦。

文章連結:http://aukalun.blogspot.hk/2015/05/blog-post_20.html

更多:
[山野童樂] 小朋友行山 學愛惜生命
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。