小朋友 行山有行山友個個禮拜,無論風雨都會帶佢哋嘅細路去行山。有時陪佢哋一齊行,見一班幾歲嘅人仔唔單止身體壯健,仲對大自然建立一套包容、欣賞嘅態度。佢哋唔驚小動物之餘,仲唔會話要整死佢;甚至見到棵瞓低嘅植物,都主動去扶番正佢。見到呢班細路,我山雞先至對未來嘅香港,有番少少希望囉。

同一位有豐富幼兒教育經驗嘅朋友傾開,佢就大力鼓勵大家帶小朋友行山。因為:

1. 行山可鍛練身體
2. 行山可吸收大量知識。
3. 鍛練自理能力
4. 認識大自然,強化人與人之間,人與大自然之間嘅溝通能力。
5. 從動植嘅生長與死亡,認識生命,愛惜生命。

一家去大細行山,唔只令小朋友認識大自然,仲可以增進一家人嘅感情。
一家去大細行山,唔只令小朋友認識大自然,仲可以增進一家人嘅感情。

管教細路呢家嘢,我山雞真係識條鐵咩。不過,今日有朋友就傳嚟一篇雜誌嘅文章。我原以為係雜誌介紹嘅行山徑唔清楚,叫我補充啲資料,點知一睇之下,原來係教人去摸蜆!

香港嘅大自然環境已經日漸變差,野生嘅生物已經越嚟越少。呢份雜誌唔係叫人去睇海洋生物,而係叫人捕獵佢哋,之後仲教人點煮!唉,最令我無名火起,就竟然將摸蜆包裝成親子活動。我唔講潮退去海灘有幾危險(舊年東涌有人摸蜆浸死),剩係教小朋友喺大自然捉野生小動物,然之後仲煮嚟食,咁唔尊重生命,我就真係接受唔到囉。

(有人話摸蜆同釣魚其實無乜分別,叫我唔使大驚小怪。咁唔該嗰啲人睇睇BBC嘅節目《Extreme Fishing》,高尚嘅釣魚運動,同樣係要講求海洋生態平衡,釣魚唔係為咗釣嚟食架。)

更多:
[興烚烚] 炎夏行山救命法寶
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。