炎夏行山 休息要識搵位行山唔係比賽(嗱,毅行者雖然計時,但唔屬於競技比賽呀,籌款就應該鬥多。),見攰見口渴見有風景睇,停低休息絕對不為過。特別係炎炎夏日,人嘅身體並唔係機器,行到咁上下絕對有需要唞一唞。不過山頭雖大,但亦唔係話唞就唞,要應該要揀下位。我就根據以下幾項原則:

風景咁靚,又咁闊落唔阻人,唔係咁都唔唞下呀嘛?
風景咁靚,又咁闊落唔阻人,唔係咁都唔唞下呀嘛?
  1. 唔阻人:無論幾攰幾想休息,都唔好喺狹窄嘅山路停低。當然,行一次山總會遇到有人鍾意坐喺樓級吹水食嘢攤唞。你要喺佢身邊左穿右插,你自己都覺得討厭。己所不欲物施於人呀!
  2. 有遮陰:親眼見過有Pair男女喺三十幾度嘅太陽底下坐喺度,男士話個佢女友覺得頭暈。夏天行山,有太陽曬住同有遮陰,溫度隨時相差五度。既然覺得熱要唞下,無理由想越坐越熱啩?就算有唔舒服要即刻唞,都盡量去到有樹蔭嘅地方先。
  3. 有風吹:有自然風當然可以令身體降溫。畀啲耐性搵下位,山野地形複雜,行多幾步隨時已經係唔同世界,搵到個風口。
  4. 避蚊蟲:山谷位雖然有樹蔭,但若未防蚊準備,我就唔會停留,無謂餵蚊。
休息要識搵位_003
案發地點衛徑第六段,有對男女坐喺樓級,畀太陽曬住,但係又話有人頭暈……

補充一下,行山時嘅休息時間每次最多五分鐘,因為唞得太耐要整番著要浪費更多體力。除非預咗hea行,計劃咗去野餐,睇靚景(譬如行開馬鞍山,一定會預半粒鐘喺昂坪睇風景。),我盡量唔會坐,因為一企番喺身,雙腳有一段時間先可以重新適應。而休息時,盡可能放低背囊(嫌污糟咪掛喺樹上),幫背脊降溫。此外,休息期間亦可調較鞋帶,整理背囊、水壼等。

休息要識搵位_002
就算有設備咁好嘅郊遊地點我都好少埋去坐,因為一坐低唔知幾時會郁得……

更多:
[山野餐廳實搵笨?] 13蚊一粒墨魚丸
[上山容易] 婆仔上樓級大法
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。