落山4項基本要訣_002我山雞喺呢度寫咁多篇文,講咗咁多嘢,全部係自己膚淺嘅經驗,我只希望藉呢個平台同各位行山友交流、切磋。大家千祈唔好當我係咩權威,呢個世代,資訊咁流通,大家亦懂得獨立思考,絕對唔會有咩權威。

我戴咁大個頭盔,一來出自肺腑,二來今次講嘅話題,其實我相當無信心。

因為,我畏高,我怕落樓級,我怕跌,所以我更怕落山。

講完上一篇「婆仔上山法」,點都要講落山,避無可避。好嘞,將我所知盡講啦。

落山4項基本要訣_001
負重落山更需要小心。前頭呢位哥仔,已掌握落山基本要訣:重心低、雙腳彎曲、側身。

落山要點(包括樓級、斜路、碎石路):

  1. 盡量將重心「坐低」,以免身體失平衡碌落山;
  2. 雙腳微彎,有助降低重心,亦可以減少雙腳衝擊;
  3. 上半身微微後傾;
  4. 微微側身,左右腳可交叉而行。若落山時失平衡,因重心已「坐低」,所以只係屁股著地,損傷有限;(若太斜嘅碎石路,甚至可一邊手觸地)

    落山4項基本要訣_003
    有人話用行山杖落山會安全啲。但係我見用行山杖落山,而跌傷嘅人都唔少。

嗱,上面四點其實只係好基本好基本好基本嘅心得,只係保護你落山嘅時候唔會一仆一碌,唔保證你行得快。落山最難掌握嘅問題,其實係因為要用比較少嘅體力,心態上希望可以加快速度。但其實落山(由樓級以至碎石路)需要比上山更多嘅耐性同專注,因為落山時踏錯一步,後果相當嚴重。

咁要點做?我覺得落山最重要嘅,就係「腳感」。

打籃球有所謂「手感」(有手感嘅球員可以10射10中),咁落山嘅「腳感」呢?大致包含:對路徑嘅判斷、身體平衡嘅感覺、對自己能力嘅信任,甚至對每嚿石頭嘅判斷(嚿石會唔會鬆?)。上述種種,全部都要喺你落腳嗰一刻,全部作出決定。而呢個直覺,根本無得教,無得學,全部係由你自己一步一步操練所掌握得到。

補充一句,落石屎路有咩方法減少雙腳衝擊?我就會跑落山,長痛不如短痛,所以行山之餘,都應該間中練下跑。

講咁耐,咪怪我老套,行山始終無可避免都係計K數。K數夠嘅話,由雞公山衝落水浪窩,你都唔會腳震震囉。

更多:
Fitz.hk Facebook專頁
[山野餐廳實搵笨?] 13蚊一粒墨魚丸
[上山容易] 婆仔上樓級大法
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。