[唔係萬能] 世俗人對山友的5大誤解

由

2017-03-02

Fitz > 運動 Sports > 行山 Hiking > [唔係萬能] 世俗人對山友的5大誤解

行山友經常被人誤解，有啲人仲以為行山友係超人。以下講法，係山友間集思廣益而來，大家睇完唔使喊。

1. 「同我殺咗隻曱甴佢！」
由老婆至老友，都以為行得山多，見得多蛇蟲鼠蟻，就以為我哋乜嘢核突嘢都唔驚。我哋見得多，唔代表唔會怕！

2. 「喺山上面你又搵到路，行東京你竟然唔識路？」
去旅行，最怕遇到啲朋友「用到盡」，更加怕有人以為山友會識睇地圖，會有方向感。山徑有路牌，有標距柱，東京街頭，就算有路牌都係日文，更何況人生路不熟，我哋真係有人肉GPS咩？

3. 「前面呢座山叫咩名？你唔係唔知呀嘛？」
香港幾百座山，唔識有幾奇？更何況唔係每一位山友都會對山有研究，行山友都分好多種，有啲鍾意睇古跡，有啲鍾意睇風景，有啲鍾意齋行。世間事唔使乜都要識呀嘛。

4. 「呢粒星叫名？乜你唔係夜晚行山嘅咩？」
你估以前啲水手要靠睇星搵方向咩？！行夜山當然要欣賞下星空，不過唔一定會對星星有研究囉。

5. 「乜你唔係鍾意行山嘅咩？點解仲係咁肥？」
行山有益身心，不過唔係減肥嘅好方法。同埋，大多數山友都好食得，行嗰10公里，隨時食番20公里返嚟！

大家對於呢啲誤解，其實都無謂動氣丫。正所謂「山友有愛」，就發揮大愛嘅精神囉。