我的紅花嶺路線

猴年大初三，有位朋友拎住Fitz郁民WL嘅介紹(《香港秘境—紅花嶺、蓮麻坑》)，約我去沙頭角行一轉。我見佢咁支持我哋，就恭敬不如從命。而自從年初三Post咗幾張相上Facebook，呢一個月嚟，就不斷收到朋友查詢，問我哋點去紅花嶺。

結果，我覆咗幾次PM後，心諗不如索性公諸同好，講下我嘅路線。戴個頭盔先，呢次我同朋友只係hea行，行到咁上下就撤離，未有落礦洞。大家想去礦洞，就睇番WL嘅介紹啦。

下面張圖，就係我哋年初三嘅路線。(藍色線)

起步：下担水坑

1.  喺上水廣場地下巴士總站，搭九巴78K，到下担水坑站落車。唔記得落車都唔緊要，因為下個站已經係總站，係要禁區紙先去得。你無證會畀人揼你落車。
2. 落車後，千祈唔好入村。(當地村民話，唔係無路，不過好難搵) 繼續沿馬路靠左行，轉彎後上斜。到上斜嘅盡頭，臨落斜附近，左手邊有隱閉山路入口，入口會有絲帶標示。
3. 記住呢啲絲帶，你一路都要靠佢。

中段：下担水坑至紅花寨

1. 初進山路，尚有不錯嘅山徑。但登上第一個山頭後，開始要剷林。
2. 中間會經過前英軍碉堡，以及營舍。
3. 這樣大概要剷林達一小時之久，突然之間豁然開朗，因為已到了紅花寨。

末段：紅花寨至紅花嶺

1. 這段沿山脊而行，路線清楚。但勝在開揚廣闊，可北遠眺深圳，南可望到八仙嶺、九龍坑山，甚至有人話望到畢架山。
2. 登上紅花嶺後，會望到發射站側有石屎車道。
3. 沿車道而行，半小時後到到禾徑山道。可行出沙頭角道搭車回上水。

距離：約7公里
需時：4-5小時 (我係慢腳呀)

注意事項

1. 紅花嶺尚未開發為官方行山徑，山徑指示為0。所以，除了自備地圖指南針，更可依照路徑嘅絲帶而行。
2. 我呢條路初段要剷密林，經驗少啲，體力差啲者唔係太適宜。
3. 沿路、起點及終點都唔會有補給，真係要好好預備。
4. 由山徑嘅環境，以至樹木嘅品種，紅花嶺都畀我耳目一新嘅感覺。至少，喺呢到行山，真係唔見到有人工石級，更加唔會有石屎步道啦。
5. 講開石屎路，有人搞咗個群組關注郊遊徑石屎化問題，大家請多多支持啦。

更多：
Fitz.hk Facebook 專頁
香港秘境—紅花嶺、蓮麻坑
華山深度行
Fitz Hiking 行山