明明我已晝夜無間踏盡面前路，夢想中的彼岸為何還未到，3KM又3KM，3KM又3KM……
當毅行者的100KM不是100KM，毅行者需要嘅唔係驚人嘅耐力同意志力，而係超人嘅能力
0530出發，04XX喺 CP5 退出，23小時完成了大會所講嘅53KM，如果要完成，應該需要44至46小時，但大會限時38小時，即是你喺香港玩開32小時，你嚟到韓國已經會玩唔晒…
原因可能有兩個：
- 所有山難度唔係雞公山就係大帽山
- 全程根本就唔止100公里
答案係，兩者都係呀，大佬，人都癲……
以一個12年行山經驗，參加過七次毅行，包括一次半程日本，最快行過27小時，最耐行過47小時嘅我夠膽講，我就算再落去，38小時都唔知行唔行得完，因為大會所謂平路都雞公山咁款，然後第六段又話極難，我唔敢想像，而且大部份水站到臨收之前都無哂嘢，無水無糧搏落去，講真無謂，嚟玩係為開心，原本睇韓國山景，係相當唔錯。
我暫時最想講係，深深體驗呢一句說話
「毅行者從來都唔容易」
唔係咁難，我唔會再體驗到香港嘅行山徑係規劃咁好，我愛麥理浩，亦愛香港樂施會
- 原來每500米有條標誌竿係咁緊要，因為小目標可以累積大目標，但喺韓國就好似老細唔覺唔覺係咪都加你task
- 原來10KM 度就真定要加水加糧，唔係要你做超級毅行，或者好似去露營咁，帶齊你一生嘅食物去，越係隊尾就越要Support ，吓吓打烊售罄真係無計
- 原來香港真係好安全，韓國唔少路徑都係一條膠帶，圍住個崖邊，而且好多路都係麥徑第四段長城嘅無限延伸同無限上落版
仲有未提大會供應嘅飯團，令我地另一隊嘅何亨同 Dora 食物中毒而嘔到驅魔人咁款，其他隊有人仲入咗廠，真係人都癲
不過全程都好有愛係真嘅。
有主動嚟搭訕嘅韓國大叔，仲送青瓜我地食，我地任性地去餐廳食個晚餐，有對夫婦幫我地 order 嘢食，仲送米餅，餐廳老闆仲要我地飲米酒（笑咗），有四個鬼妹英語老師，走剩兩個然後同行咗一段，傾咗成個鐘計，有由英國嚟嘅香港人嚟做 support 幫手影相同係斷水斷糧斷麵嘅時候俾可樂我地，仲有最後邀請我搏落去嘅猛男。
人生係應該搏命，但唔係唔知會點都搏，咁樣係想駁命多過搏命。
誠邀參加韓國毅行嘅香港朋友一齊分享呢次毅行感受：
- 日期：5月25日 (星期四)
- 時間：晚上8時正
- 地點：牛池灣銀池徑八號 二樓
- 主題；韓國毅行經歷分享
- 主辦：Free Foundation
- 費用：免費入場 (歡迎公眾人士參加)
相信下年有得玩，會搞得更好，韓國山景係靚，想參加都可以嚟吖。
「獅子山」小隊籌款網頁：https://oxfamtrailwalker.or.kr/en/node/5252
>
更多：
Fitz Facebook專頁
[有一班行山友叫獅子山] 寫在韓國毅行六個鐘前…
[有一班行山友叫獅子山] 韓國毅行第一戰「敢死隊」
[出戰韓國毅行] 有一班行山友叫「獅子山」
[韓國首屆樂施毅行者] 踏上全羅南道 進入仙境 文化遺產之旅
人稱Law少，前電台主持及監製，酷愛體育運動，多次參加馬拉松及毅行者活
動，近年更嘗試進軍三鐵及渡海泳。對於跑步、對於行山、對於比賽，均有深刻而令人動容的看法。著有《原來在沒有盼望 的地方才需要盼望》。
