Fitz > 運動 Sports > 行山 Hiking > [毅行備戰2015] 第二段: 大浪西灣至北潭凹

毅行備戰II_f[按:「毅行備戰」呢個系列,想將毅行者嘅基本資料重新整理,山雞希望可幫到各位毅行新手啦。各位如果係毅行老手,亦歡迎同大家分享你行毅行者嘅經驗。]

第二段:大浪西灣至北潭凹01
離開CP1就要穿越大浪西灣海灘。注意最盡頭為往鹹田灣之路徑。

第二段:大浪西灣至北潭凹(CP1—CP2)

標距柱:M031-M048
距離:8.8公里
途經:離開大浪西灣後,越過小山落鹹田灣,再上大浪凹落赤徑,再上長命斜達北潭凹CP2。
CP2官方補給:北潭凹為基本補給站,有齊基本補給飲食(水、麵包、熱飲、熱湯、水果等)
民間補給:大浪西灣及鹹田灣有多間餐廳士多,由汽水寶礦力以至餐蛋面一應俱全。其中鹹田灣海風士多更有即炒飯麵。

赤徑靚景。當然,行緊毅行你都未必有心情睇。
赤徑靚景。當然,行緊毅行你都未必有心情睇。

路況:
1. 途經兩個沙灘(大浪西及鹹田灣),小心鞋子入沙(算啦,之後80公里你都唔會再見到沙灘了);
2. 基本為石屎行山徑;
3. 由鹹田上大浪凹以及由赤徑上北潭凹,俱為長命大斜路;

樂施毅行者官方地圖:

第二段:大浪西灣至北潭凹04
不少人選擇在CP2大休。但若在鹹田灣食過飯,則可在此作簡短停留,再進入第三段,唔使同人逼。

第二段注意事項:

1. 目標時間 (註)
全程25小時:CP1到達時間應為3小時15分,CP2則要1小時45分
全程30小時:CP1到達時間應為3.5小時,CP2則要2小時15分
全程35小時:CP1到達時間應為4小時,CP2則要2.5

2. 補給/食飯:最遲一組出發(中午12:30)的朋友,若果屬30小時左右的慢腳,到達鹹田灣大概下午五至六點(到CP2已天黑了)。我的經驗就是索性在此食晚飯,免卻麻煩Support Team之餘,又有熱飯可食。記住,未來廿幾個鐘,你唔係捱麵包,就係要冷飯凍湯架嘞。

3. 出大浪西灣往鹹田灣,到大浪西沙灘最左方時,要穿過河流上山。但河流經常改道,勿因心急過河而弄濕鞋襪。

4. 落鹹田灣的正式麥理浩徑,要穿過矮樹林。但該處或有積水,容易整濕鞋襪。我會選擇穿過沙灘,過橋路經士多,再接山徑。

5. 呢一段路程唔算長,路況甚佳。但仍要記住:仲有個鷄公山等住你爬,留下力啦。

註:有關「目標時間」

毅行者各站目標時間
(按圖放大)

參考自樂施會官網2012年參加者小冊子,千祈唔以為係行貨,根據本人經驗,佢列出嘅「目標時間」極有參考價值,計埋路況、山徑艱難程度,甚至休息時間。參加者依住佢個時間,可控制自己步速。

至於我只列舉25至35小時作參考,是基於對新手來說,這個時間概不用捱兩晚眼訓,而又不太難去衝破。當然,提多一次,呢個毅行備戰系列主要為新手而設,各位老手有咩心得,記得留言同我多多交流呀。

更多資料:樂施毅行者官方網頁

更多:
[毅行備戰] 第一段: 北潭涌至大浪西灣
[上山容易] 婆仔上樓級大法
山雞其他文章
Fitz Hiking 行山


文章為作者意見,不代表Fitz立場。