漁護署大鑼大鼓，宣佈「自己垃圾自己帶走」計劃已見成效，郊野公園遠足徑沿途嘅垃圾桶，將會一個不留。
漁護署就用11條山徑嘅數字，去證實佢哋嘅樂觀睇法。受監察嘅山徑中，以鳳凰徑第八段最理想，佢哋嘅垃圾少咗89%；衞奕信徑第二段和大潭家樂徑，垃圾收集量減幅分別為86%同79%。所以，漁護署覺得市民已懂得帶走垃圾，唔使垃圾桶都得!
我始終都覺得呢個推論係相當武斷：
- 垃圾收集嘅數量少咗，唔代表垃圾少咗，有可能只係收集唔到。例如有人將垃圾揼落懸崖、溪澗，只係當區收集唔到呢啲垃圾
- 近年，越來越多團體、市民，自發上山執垃圾；多人執走咗啲垃圾，政府嘅收集量又會少咗。
- 同一報告，城門水塘菠蘿壩自然教育徑嘅垃圾收集量增加10%。如果話市民識得自己拎走垃圾，咁又點解釋?
所以，政府唔好咁快領功，部份山徑嘅垃圾少咗，未必係市民多咗公德心。早幾日有人喺黃龍石澗煮飯搞到山澗變污水渠，大東山爛頭營幾間石屋每年都有人走上屋頂紥營。呢啲咁嘅人，斷估唔到因為政府講幾句，就可以改變佢哋嘅壞習慣!
2017年初大帽山所拍攝嘅經典視像
《我嚴重警告所有唔識回收同處理自己垃圾既人咪撚再行山露營扮親親大自然》
不過，對真正愛護郊野嘅朋友而言，「自己垃圾自己帶走」呢個舉動，唔使人教都應該要做，所以我哋基本上支持撤走垃圾桶。亦如行勻全世界山徑嘅阿寶話，世界各國嘅山徑，根本唔會設有垃圾桶，呢次政府撤走垃圾桶，只係「重回正軌」而已。
仲有就係，漁護署與其自吹自擂，不如讚揚下幫手執垃圾嘅團體、個人，佢哋都有份減少郊野嘅垃圾量!
Fitz Facebook專頁
究竟發生乜郊野事
[自己山野自己救] 山頭很大 竟容不下公德心?
[郁民教室] 行山垃圾點處理?
Fitz.hk Hiking 行山
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。
