Fitz > 運動 Sports > 行山 Hiking > [行山友剋星] 石屎山徑一條都嫌多

[行山友剋星] 石屎山徑一條都嫌多 5
過往嘅舖路方式,令山友帶來唔少樂趣。
記得第一次參加毅行者,辛辛苦苦行到基維爾營,撐過四大段麥理浩徑,抖摟精神,繼續行埋落去。點知,一踏上沙田坳道,發覺原來仲痛苦過上雞公山!嗰時先知,原來石屎路係行友山嘅尅星。

自此之後,行山遇著石屎路,就好似打邊爐遇晒gas,燒嘢食啲炭濕鬼晒一樣。要行石屎樓級,要行人工舖嘅靚路,我點解唔去商場,唔行彌敦道?再加自己腳板唔多肉,行多兩步真係會腳痛架!

九龍坑山嘅石屎樓級,睇到都feel到腳痛。
九龍坑山嘅石屎樓級,睇到都feel到腳痛。

直到最近,有人開設一個叫「關於郊遊徑石屎化關注小組」嘅群組,個名聽落雖然有啲溫吞,到喉唔到肺,但佢哋確實提出我一直嘅疑問,就係:

郊野地方,點解要起人工設施?

根據呢個群組嘅研究,佢哋發現呢啲石屎山徑,會帶嚟以下問題:

  1. 水泥化鋪路會令泥土喪失吸收雨水能力,增加水土流失嘅機會;
  2. 影響植被嘅根部發育,使樹根不能呼吸而死亡;
  3. 石屎路有積水不能排去,積水會滋生蚊蟲;
  4. 石屎吸熱比泥地為高,在夏季的陽光下,混凝土平台的溫度可比氣溫高攝氏6-10度。
圖:關於郊遊徑石屎化關注小組。佢哋發現大欖涌郊遊徑一段山路,已舖好靚靚石屎路,仲斬開晒啲樹,擴闊咗路面。
圖:郊遊徑石屎化關注小組。佢哋發現大欖涌郊遊徑一段山路,已舖好靚靚石屎路,仲斬開晒啲樹,擴闊咗路面。

或者,有人會話,啲山路整得靚啲,就可以令更多人鍾意行山。不過,我作為一個普通山友,就覺得石屎山徑對行友山百害而無一利:

  1. 石屎路傷腳,行得多會腳痛;
  2. 鋪得唔好嘅石屎路,落雨時會好跣;
  3. 行沙行石就係行山嘅樂趣之一,舖咗石屎路就減少行山嘅樂趣。

睇上面呢個群組,佢哋已經搵咗有關部門反映呢方面嘅意見,雖然而家呢個時勢,呢個政府都係唔理居多,但各位山友都要繼續關注呢個問題,我唔希望第日要專登逼車逼船,先搵到條泥路行下囉。

資料來源及連結:關於郊遊徑石屎化關注小組

更多:
Fitz.hk Facebook專頁
[很想和你行行澗] 送你3條一星級山澗 (附行澗須知)
我的紅花嶺路線
Fitz Hiking 行山


文章為作者意見,不代表Fitz立場。
歡迎投稿: https://fitz.hk/contribute/