Fitz > 運動 Sports > 行山 Hiking > [谷埔封村7日] 點解呢到咁值得保育?
圖片來源: eric-cafe.blogspot.com

近呢幾年,我山雞經常都規劃一啲行山路線,但總係有意無意避開荔枝窩、鎖羅盤一帶。

當中原因好難一概而論,其中一個原因,就喺嗰一帶經常聽到「封村」、「封路」嘅消息,好擔心介紹一啲行唔到嘅路畀人。

谷埔封村-有土地就可以封路-01

呢個禮拜,谷埔、鳳坑嘅村民又話要封村7日,話「不滿規劃署將村內荒廢農地列作保育用途,又無討論賠償細節」。

內裏原因,係村民指政府將佢哋嘅土地列為保育用途,又唔傾賠償,搞到佢哋無得發展喎。

圖:都市日報
圖:都市日報

其實喺2016年4月,已經有報道話,呢一帶有過百棵大樹遭人斬伐,其中包括佢哋風水林,以及多棵半百歲嘅老樹。

事實上,依據政府嘅環保報告,呢一帶由棄置農耕變為嘅濕地、海岸嘅紅樹林,以及荒村嘅溪流,發現唔少甚具價值嘅野生動植物。當中包括:

  1. 植物:土沉香、港油麻藤等
  2. 動物:香港獨有的香港鬥魚、弓背青及菲律賓枝牙蝦虎魚
谷埔、鳳坑一帶,棄置嘅農地反而令生長欣欣向榮。
谷埔、鳳坑一帶,棄置嘅農地反而令生長欣欣向榮。

動植物對大家有咩好處呢?之前我哋講過,近年香港多咗好多蠓,好難根治。有長期同土地打交道嘅本地農夫,就話係因為新界大多數耕地已變為工場、停車場,甚至廢物場,令原本喺農地生長嘅青蛙、青蜓呢啲食蠓嘅動物大減,於是蠓嘅生長就一發不可收拾。

大道理我山雞就唔識得講,不過仲知咩叫人傑地靈。祖先留低嘅土地可以咁生機勃勃,其實應該好好保留,唔通係要搞到佢變做垃圾山?咁仲對得住列祖列宗?

圖:明報
圖:明報 (2016年4月)
漁護署「具重要生態價值嘅河溪,有一部份就喺谷埔、鳳溪一帶。
漁護署「具重要生態價值嘅河溪,有一部份就喺谷埔、鳳溪一帶。

有次去深水埗行街,見到一間開喺舊樓地下嘅藥房,為咗保護招牌底下嘅燕子巢,索性搬開晒門口嘅貨物。問呢位老闆,點解咁麻煩都唔剷走個鳥巢,佢話:「你間舖唔旺都唔會有燕子築巢啦!我歡迎佢都嚟唔切呀!」

村民或者真係有土地嘅業權,不過佢哋係咪就可以控制埋嗰到嘅環境?可以消滅嗰到嘅動植物?可以封路唔畀人出入?

土地業權係你,並唔代表你係大晒。

資料來源:綜合報章報道

更多:
Fitz.hk Facebook專頁
[學好廣東話] 北潭凹 鉛礦坳 咁都有得拗?
[行山友剋星] 石屎山徑一條都嫌多
Fitz Hiking 行山


文章為作者意見,不代表Fitz立場。
歡迎投稿: https://fitz.hk/contribute/