[都市傳說] 香港3個最有「靈氣」嘅地方

同幾個九十後山友傾開，發現大家雖然好鍾意香港，有啲甚至要誓死捍衛香港價值，不過佢哋對香港嘅歷史都唔係不甚了了。比如話，大埔運頭塘同橫頭磡，其實係日軍將平民百姓斬頭嘅地方，所以就會有呢啲地名嘞。

講開又講，以下呢三個地方充滿「靈氣」，不過係靈異嘅「靈」呀。

1. 鎖羅盤

• 位置：新界北邊境，近荔枝窩
• 異像：指南針會突然失靈
• 傳說：日治時期，有人到訪鎖羅盤村，發現指南針失靈。並且發現村落居民全部失踪。其後該名男人心臟病發而死。
• 現實：根據靈異專家陳雲海 (已轉型為炸兩俠) 考證，該地村民坐船參加婚禮，船隻浸沒，死掉大部份村民。自此村落荒廢，被人誤以為村民一夜失踪。

2. 五桂山

• 位置：觀塘 (藍田後山)
• 異像：泥公仔、稻草人
• 傳說：有人在此打war game，色彈打中一個稻草人，顏料的分佈似足七孔流血。但奇怪在附近並無農田。所以有人稱呢度做「五鬼山」。
• 現實：
  1. 八十年代有晨運友喺呢度制作泥公仔，用以裝飾山頭。不過呢位伯伯後來過世，公仔無人打理，顏色脫落，被誤以為是稻草人。 (其實夜晚見到呢啲公仔都幾驚)
  2. 清末有五位海盜盤據此地，當地人稱為「五鬼山」，後改為五桂山。

  

3. 新娘潭

• 位置：大埔近烏蛟騰
• 異像：潭中有隻腳
• 傳說：有人嫁女，新娘隻轎經過呢到，發生意外跌落瀑布死亡。其後不斷有人喺瀑布嘅水潭，見到有隻腳。於是呢度就有大量嘅撞鬼傳說。而新娘潭路成日有交通意外，又話關呢個傳說事。
• 現實：無從考證。不過根據維基百科，話新娘由烏蛟騰嫁去鹿頸。但烏蛟騰咁大條古道直接通去鹿頸，又點使經過新娘潭？

  

嗱，帶番個頭盔先：靈異嘅嘢，非嚴謹嘅科學研究，大家當係都市傳聞聽下就算嘞。

資料來源：維基百科、Businet.com.hk

更多：
Fitz.hk Facebook專頁
[大霧行山] SMS打卡出事搵到你
[行山友剋星] 石屎山徑一條都嫌多
Fitz Hiking 行山