Fitz > 運動 Sports > 跑步 Running > [樂施會 x Fitz] 視覺藝術展跑團導賞 親身感受香港貧窮問題

可能係香港第一個跑團 + 藝術導賞活動!

樂施會 x Fitz「勞力是…… #窮得只剩份工 視覺藝術展」跑團導賞,1月24號晚,一眾平時四圍郁嘅跑友,喺導賞員 James 帶領之下,走入 賽馬會創意藝術中心 JCCAC 展覽廳,欣賞展品同感受香港貧窮問題。

展覽除咗有謝至德拍攝吳安儀、梁卓偉等名人,化身前線工友嘅《有名有姓》,館內仲有好多值得深思嘅作品,包括陳巧真拍攝「倒樓」垃圾工嘅短片「叫我陳太啊」,特別觸動人心,值得一睇!

欣賞展覽後,跑團活動正式開始。熱完身,跑友圍繞 JCCAC 跑兩個圈,聽落輕鬆但原來好戲在後頭。返到起點之後,大家要化身速遞公司長者員工,被無良老闆差遣,揹起速遞包走上七層樓梯派件收件,親身體驗佢哋平時嘅生活。

問: 點解有啲速遞公司聘請咁多長者做速遞員?
答: 因為佢哋有$2公共交通票價優惠,可節省公司開支。

跑到身水身汗,最後任務完成!在此感謝樂施會邀請,以及所有報名參加嘅跑友,展覽星期五(年三十晚)晚上9點完結,仲有少少時間,推介大家到場睇一次!



勞力是…… #窮得只剩份工 視覺藝術展
日期:2017年1月10日至27日
時間:11:00-21:00
地點:賽馬會創意藝術中心 L1 及 L0 藝廊(石硤尾港鐵站C出口)
展覽網址:www.oxfam.org.hk/povertyfulltime

樂施會 Oxfam Hong Kong Facebook 專頁

更多:
Fitz.hk Facebook 專頁
[Fitz行山團] 赤口行大運.南丫島菱角山