Fitz > 運動 Sports > 跑步 Running > 跑步潮語字典 (中篇)

跑步潮語字典 中篇_f

1. 帶套同戴袋
要玩得安心放心, 一定要帶套同戴袋,因為新常態是跑步先至來落雨。明明跑渣馬時我已經用了大會提供的行李袋,點解會滲水,等我無一件乾衫著走,電話都報銷埋。所以,安全性行為呀,唔該。緊記帶套同戴袋。

2. 青公
跑步要有海是常識。青山公路是香港其中一條最美跑步路線。青公有神經俠侶常常出沒跑步, 你又知無? 我見過, 我真係見過。
青公(又稱青山道),全長56公里,是全港最長的公路。
荃灣如心廣場至屯門的一段,是跑步的熱門地點,特色是全程勁多selfie位。
跑步潮語字典 中篇_02這段路九成是全方位無敵海景,途經多個公園、沙灘及碼頭,可遠眺青馬橋近看汀九橋,而且一路向西,可以追著個日落來跑, 加上青馬橋是一絕景致。有一次從黃金海岸折返, 去到深井時跪底,係七仔買啤酒再去對面買燒鵝髀免切, 走到海邊,享受一條佬的浪漫,所以補給不是問題。

從如心廣場至屯門黃金海岸已有15公里,來回一轉有30公里,作為一堂長跑課實屬不二之選。一世人流流長, 點都要走一兩轉青公。

3. 食梅或拍梅
講青公, 又怎可以不提食梅, 『梅』是指馬鞍山富安附近的梅子林路, 是最佳模擬渣馬魔鬼賽道的練習路線。在沙田運動場放好行李後出發, 經馬場向大埔方向跑, 途經科學園, 一直跑到大王廟, 靠右跑, 沿大埔海濱公園海旁跑, 到達水陸墟後折返。回到孖橋時往馬鞍山公園方向跑, 跑到雅典居折返, 直奔梅子林, 梅子林單程大概是一點七公里, 前段暗斜,後段較斜。要來回走五轉, 然後call 白車送去醫院。
晚上不建議跑, 搵鬼陪你跑咩?

4. 水戰
跑步先至來落雨! 全中, 個天係唔鍾意你嘅。在雨中長跑你會感到好熱血, 是另一種浪漫。今年渣馬, 能夠同一眾港 跑女乳戰過, 〔打錯〕係雨戰過是戰績, 跟蠱惑仔的刀疤一樣,是身價象徵。

5. 烈陽神功
第一次聽到烈陽神功是在金毛楊的一個訪問裡, 他說好成績或多或少同開始減肥時在中午最猛烈陽光時練跑有關。烈陽神功是指在酷熱警告日子的大毒日下暴曬著跑步。在沙田跑步的話, 你可能有機會遇上烈陽[神]教主。他是誰? 答案可在內文找到。

免責聲明: 練功時須家長指引及陪同, 示範人士 – 烈陽[神]教主經過自己長期訓練,家中的你切勿模仿。

6. 索K
有人話: 「只要你有跑三公里的能耐,約連跑20分鐘,循步漸進,你就有跑馬拉松的潛力。」很多院友信了, 從此跑上癮。有時毒癮發作, 院友會不理情況, 爭取時間索K. 索K是指百忙中抽時間增加長跑練習完成的累積公里總數(Km).

7. L.S.D.
英文全寫是Long Slow Distance, 即長課或慢速長途練跑。LSD會令人聯想到迷幻藥, L.S.D長課通常距離都超過30km, 跑完有迷幻感覺唔出奇。有長課, 當然有短課, 短途練跑距離大概是十至十五公里。

8. 來回地獄又折返人間
馬拉松訓練是極艱苦的,有時練長課會中伏,遇上一條甜頭少勁辛苦嘅路綫,跑到有頻死的經驗,最後還陽,死去活來,有重返人間既感覺。

9. 運毒場
有標凖田徑跑道的運動場。講開就講, 不可不提醒大家儲物櫃保安及更衣室花灑問題。已經聽過很多爆格穿櫃事件,花灑水溫永遠唔夠熱,冬天聽過師兄沖涼時慘叫之後暈咗。還有花灑水力不夠,水是滴出來, 沖個頭沖幾日都沖唔乾淨。講到口臭都未見有改善。

10. 膠功課
交功課,是解作跑友將長跑練習結果及數據上傳到長跑長友Facebook群組內。院友交的功課比返工更畀心機,多相多圖﹑用跑步App製作吸睛infographics,大頭高炒四六面滴汗相﹑有感性文字﹑有詩有詞﹑有對聯﹑有佛偈﹑有gag, 乜都有。

11. 包膠
是指賽後報告。跑畢全馬, 院友會把42.195公里的身心靈歷程寫下來,我見過runner-blogger烈女的包膠,文字以外,還有聲有畫,讀起來,趣味盎然,佢可能用上比跑馬拉松更長時間去寫。最毒係海外馬拉松報告,從登機一刻開始報,真人show一樣,報到返來香港做物理治療為止。你會不心動想報一隻海外馬嗎?

有啲院友全程用GoPro 4K 拍攝,四小時再剪輯成幾分鐘MV,音樂是配上Coldplay的Viva La Vida,使唔使咁pro呀,做爛哂個場。

(待續)

更多:
Fitz.hk Facebook專頁
跑步潮語字典 (上篇)
寫給港.跑女的跑步禮儀篇
Yiu Kwong Chan@Fitz.hk
Fitz Running 跑步


文章為作者意見,不代表Fitz立場。