[辛苦跑嚟志在食] 快腳的煩音

跑街真係可以見到好多野，尤其有啲人個自私樣，都真係幾乞人憎。

話說，有朝放假冇野做出去跑番轉。我係北角碼頭做 warm up 時，見到有兩個男人傾緊點跑點跑。好明顯，其中一位人兄係經驗老到嘅跑手。佢以一個老屎忽嘅 tone，高談偉論佢成績點快點快，要點做先練到等等。而另一個，睇佢個裝束就似係開始跑步冇耐，好專心咁聽。

放假嘅早晨呢應該係清靜嘅，所以我快快手做完 warm up 起步去。點知唔夠五分鐘，煩音又出現了。「練平路冇咩用，斜路先有料到」、「你咁慢冇用架，要快啲」、「我拖慢咗好多黎就你。平時我呢個時間已經去到柴灣啦」…..

我知道阿煩音唔係話緊我，但係都好大壓力下啫。Fine，冇緊要，你有你講，我有我跑。冇幾耐，當阿煩音同佢嘅朋友就喺我旁邊經過時，佢竟然大大聲咁「jap」咗我一聲!

我承認我係慢腳。而嗰日係 hea 跑，再慢咗少少。我心諗：「你 jap 得咁開心呀嗱，好，就睇你跑幾快！」一直跟到過咗嘉亨灣，前面遇到另一隻慢腳時我先知，原來頭先嗰一聲「jap」已經算係好留手。「唔該！慢腳就靠邊啦，阻住呀！」煩音以震撼嘅聲線大聲話前面個女仔。

其實煩音同佢朋友跑得真係唔算快，我跟佢地嗰段，俾到盡 5’20″/km 左右。更何況快唔等於大哂，有邊個未慢過 ? 學劉華話齋，「牌品好，人品自然好」。跑得快但冇跑品，旁人只會睇你唔起。

Anyway, 喺海旁跑咗幾個來回之後，我收工了。一場黎到筲箕灣點都要去安利朝下聖嘅，呢個係每次跑完呢段路之後俾自己嘅一個小獎勵。時間尚早，未有好多人，我仲好好彩咁唔駛排隊就入到！️一坐底，例牌叫個片頭切腩米同埋一杯凍檸茶。嗱，我好忍得口架啦，要米粉唔要撈麪，冇咁肥嘛。不過咁，片頭係點都唔少得嘅，因為同場加映同片頭襯到絕、香得黎唔太油嘅辣椒油渣一大羹。必叫嘅仲有茶膽濃得黎唔澀嘅凍檸茶（都係少甜少冰架咋）。

落完單後，突然身後又出現一把討厭嘅聲音。「點解嗰個女仔唔駛排但我要排呀？」煩音大聲問老板娘。「人地早過你黎，入咗最後個位啦，你要食就等下啦。」Well，人人都總有做慢腳的時候吧。呵呵。

更多：
說好了的「跑步慳錢」呢?
Karena其他文章
Fitz跑步文章