Fitz > 運動 Sports > 跑步 Running > 非一般虛榮感包包

非一般虛榮感包包早幾日如常同姊妹high tea,一踏出百德新街,就見到一群膠袋人經過。

「嘩,乜個個都狽住個膠袋出街?依家興咩?」姊妹A問。

係呀,個袋呢排真係hit爆,有錢都未必買到呀。不過,呵呵,我屋企有三個。

咪住咪住,大家千祈唔好誤會,我唔係要晒命晒名牌 。

非一般虛榮感包包_1

我講緊嘅,係渣馬呢個跑手包。嗰兩日,無論我去IKEA行街,去時代睇戲,甚至去按腳,佢都無處不在。誇張程度就好似前排興Issey Miyake個Bao Bao時,一次過見晒全個系列嘅顏色。(巧興奮呀!)

「其實咁少野喺個袋度,點解唔摺埋放入自己個度呢?攞多個袋咁麻煩。」姊妹B又問。

「型囉。」我諗,我嗰班淨係識去shopping high tea嘅姊妹,係永遠唔會明白孭起呢個袋時,個虛榮感有幾強。唔好講顏色,單係個袋就已經話緊俾人知:

  1. 你爭崩頭喺嗰黃金唔知幾多個小時內,爭到個報名名額兼信用卡順利過到數
  2. 你要好努力咁練跑(當然,努力定義因人而異)

再加上,萬一你唔小心又唔覺意咁報到個全馬挑戰組,跟手攞埋個深藍色跑手包,你仲唔虛榮到震?!嗱,有版你睇:

非一般虛榮感包包_02好,虛榮夠喇。溫馨提示各位跑友。跑手包點型都好,星期日前千祈唔好整爛個袋。因為冇咗就冇得寄行李。

嗯,食完high tea行完街,係時候操埋最後一課。小妹今年第一次跑全馬,請各位師兄師姐多多指教。


文章為作者意見,不代表Fitz立場。