唔想DNF 可以點樣?

由

2017-01-27

Fitz > 運動 Sports > 跑步 Running > 唔想DNF 可以點樣?

「我同你講呀，跑馬仔唔係講玩架，DNF笑死人架。」

唔想DNF，可以點樣?

第一，DNS咪唔會有DNF囉。當然，操咗成年，就是為了今天，無理由龜縮，有傷或其他難言之隱除外。不成理由的是天氣報告話會暴寒或落狗屎，因為從來沒有完美天氣，只有完美裝備。如果去年你因為擔心畀雨揼親而棄賽，你人生就多了一個遺憾，少了一個戰績。詳見於我在Fitz的第一個帖《渣馬—教曉我的二三事》

當天的雨是落了廿年雨量的總和，除了你入隧道時，雨會自動會停一陣之外，一出空曠地方時，雨就像《戰狼300》的波斯大軍的箭雨一樣，遮蔽成個天空，啲雨打落嚟係刺痛的。所以，置身其中，感覺很悲壯但又好L型，眾跑友就像Spartan勇士一樣，奮力向前衝。

第二，說實在，全馬無操過42.195公里不打緊，賽前一星期睡眠充足更重要。比賽時，因為心情興奮，體內會分泌大量腎上腺素，它可以幫助你走完餘下的幾公里。所以，比賽前一星期要養足精神，星期一至五都要早睡早起。睡眠不足是大忌。

第三，如果之前訓練充足，抽筋和水泡大概會是主要原因導致DNF。『老抽』可以參考這些處理方法:

跑馬拉松腳抽筋，學會這三招就不用棄賽了！

小小經驗分享，做反向拉筋舒緩時，最好有朋友在身旁。有一次跑東馬，頭段開得太快，35公里『勁抽』，諗著走埋一邊拉筋，點知唔拉由事可，一拉左腳，右腳即抽，彎腰時橫隔膜又抽，全身『老抽』，我痛到要瞓係個地下度典來典去。

好彩四位日本人從圍欄跳出來，熟手地用全力把我全身拉直，我先可以繼續跑，站起來時，觀眾以熱烈的掌聲鼓勵我，大叫「頑張れ！」，頃刻十分滾動。所以，單拖的話，我會建議大家慢慢行鬆返啲肌肉好過。

至於水泡，預防的不二之法是在腳上搽凡士林，目的是減少摩擦，減少摩擦產生熱力。願意花錢可以考慮專業運動襪，比如台灣的博克多 bogoto 防水泡襪，能夠有效減少腳的滑動減少摩擦，增加排汗散熱，又比如瑞士的 x-bionic 馬拉松襪，提供了特殊的編制技術增加散熱通道等等。

想慳錢，我見過日本跑手用白色運動膠布把腳底和腳趾包裹著，他話指定要用日本製的膠布，其他牌子當撕掉時會連皮扯破，到時叫定白車都得。

第四，正如 DJ Donald 話，做人同跑步一樣，都係要行『正』路的。渣馬當天，你預咗頭段會勁塞人，因為大家都不會按自己時間進入起跑區。一定要沉著氣，左穿右插的話，只會增加你仆街的機會。同時睇吓 GPS，你會發現你跑多了許多冤枉路。比賽是鬥最後的三成路段，十公里就是最後三公里﹑半馬就是最後六公里﹑全馬就是最後十公里。前段只是熱身，可以走 goal pacing 加10秒，warm up 夠，便來個 negative spilt。

第五，pacer，pacer，pacer。可以跟大會的，又或者自己約腳。我自己鍾意跟鬼妹跑，經驗告訴我她們的pacing是出奇地穩定。但切忌跟車太貼，同埋不要騷擾人。

第六，無品跑友好似『七仔』一樣，梗有一個喺左近。之前見過有男跑友嫌前面的女跑手慢，刻意推撞致她跌倒，膝頭擦損了一大片。所以全程都要非常警惕。又有一些自以為快腳，見你7分披，特登走到你身旁原地大大聲踏步吋你慢，咪L理佢地。咁L快，唔見你參加奧運。記著你只有一個對手 – 自己。

第七，要謹記得沿路檢查站指定完成時間，一定要在時限前死到去。唔係你就有機會坐全港九最寧靜的巴士 – 回收巴。果種死寂尤如吳大狀搖哂頭講: 「今日是你人生中最黑暗的一天。」

第八，忘記時間，跟隨感覺跑。當你的心想跑下去時，身體就會跟從跑起來。肯亞除話跑渣馬時，因為太多人，GPS收不到訊號，唯有跟感覺跑，跑吓跑吓，追上平時比她快的跑友，後段還可以加速，最後PB完走。

第九，出了西隧，真係爆咗時，嘗試把目光從會展拉回信德，把目標切碎，逐個慢慢完成，信德，IFC，龍和道，會展，灣仔運動場，銅記，維園衝線。受傷的話，便要上岸。不然的話，要堅持到最後。

第十，要把『監頭』的照片放在錶面上或手機screen-saver上，捱不著時，拿出來看，然後同自己講: 「她咁難頂，我都捱得到。最後呢10K，點難到我呀!」

各位『監頭』請息怒，講笑咋。『監躉』知道他愛的人喺終點等他，火星咁Q遠，都會返到來架，世界上只有妳先有能力令他不會DNF。