按：路跑家 Run Plus可說是發展得最快的澳門跑步社群之一。他們成員經常來港比賽，最令人難忘是他們以「包公夜審烏盆」為裝扮主題，參加2016年街馬@九龍 。今次這篇報道，就是澳門網媒廣野 Speaking的訪問，深入道出他們跑團的特色，以及對澳門跑步風氣的看法。 (本文標題為Fitz編輯所擬)
【人物講嘢】Run Plus 路跑家
兩年前，一班跑友喺網上相識，互相交流跑步成績同經驗，及後更相約一齊跑步。志趣相投之下，喺上年年初發起咗Run Plus路跑家跑團。至今會員已超過一百人，更成立咗facebook專頁，擁有自己嘅標誌、隊服，舉辦咗唔少甚具特色嘅跑步活動。呢個咁有活力嘅團體，到底佢地係點樣發展起嚟嘅呢？今日廣野請嚟幾位跑團嘅骨幹成員，向大家分享跑步嘅樂趣。
受訪者：Eric、Joe、Gloria、Jen
記：可以介紹一下Run Plus路跑家嗎？
Eric：我地係一個新興嘅跑團，成立咗半年左右。Run Plus嘅意思係希望我地團隊可以融為一體，組織有興趣嘅人一齊跑步。
記：會員點解會加入Run Plus？
Joe：我之前並冇跑步根底，但兩年前我為咗想紀念自己嘅歲數，一開始就想完成全馬。因此踏上跑途，打算用五個月時間練上去。期間受傷無數，只有一個人練，得唔到其他跑友嘅支援，變得好易放棄。後來我相識到一班志同道合嘅朋友，鼓勵我，並且幫我設計練習同作息計劃。呢個就係一個人跑同一班人跑嘅分別。
Jen：我初時都係為咗減肥而跑步，喺網上認識到幾位，約埋一齊去跑澳氹橋。我其實未試過跑馬路，因為覺得一個人跑比較危險。後來阿Joe第一次帶我跑橋，教我上橋要點樣調整呼吸同速度，原來有人陪住跑，會更加有勇氣去完成新嘅路程，同埋突破自己嘅成績。我由跑十公里，一直進步到能夠跑半馬。
Gloria：入咗呢個跑會之後，其實我會更享受跑友之間嗰種互相幫助嘅感覺，我地會中文名叫路跑家，的確係俾我一種「家」嘅感覺。
記：你地會點樣協助會員練跑？
Joe：我地會首先了解佢嘅跑步習慣以及練習目的。練習目的因人而異，有人想完成半馬、有人想提升速度、亦有人係想鍛鍊體魄。所以我地會酌情分配佢地嘅訓練內容，並且會記錄低會員嘅成績，年尾會有一個「飛躍進步奬」，頒俾進步顯著嘅會員。
記：你地係點樣組織咁多會員去跑步？
Eric：我地每個禮拜一至日都有分組練跑。練習地點主要分為澳門、路氹等大區。澳門區又會細分為水塘、西灣、松山、蓮峰球場等等，路氹有氹仔單車徑、七潭公路等等，視乎每組隊員所處地區同訓練強度而定。我地會用wechat聯繫，每一日嘅訓練會按組別各開一個小群組，畀想出席嘅會員加入，並委派資深會員各自統籌及領跑。
記：除此以外，跑團仲有咩特別嘅路徑同項目？
Eric：我地舉辦過環繞全澳門路氹嘅47公里賽（全程馬拉松為42.195公里）。亦舉辦過接力形式嘅環澳跑。
Joe：我地亦會按唔同季節或節日去舉辦活動，例如有過「中秋賞月賞燈飾跑」；天氣好嘅話，我地又會跑橋，叫做「橋峰之約」；早排巴黎人開幕，燈飾唔錯，所以又有「燈光夜跑巴黎人」；外地跑者來澳，我地又會幫佢地設計一條觀光路線，環澳門半島跑，用雙腳去遊覽本地名勝，每去一個景點就作導賞，以及幫佢地拍照留念。
Gloria：2016年7月我地喺松山舉辦咗一個「女生初半馬」，參加者都係女生，而且從未跑過半程馬拉松。我地委派會員做配速員，以一個帶一個嘅形式陪伴參加者跑完半馬，幫助佢地突破心理嘅障礙。
記：Run Plus喺海外有咩活動？
Eric：2016年11月我地辦咗首次秋季旅行，去台灣比賽，好榮幸得到奬項；而喺12月嘅「皇者之戰」，我地亦攞咗女子組嘅全場總冠軍。
記：你地係點樣喺咁短時間內，發展到目前有咁多會員？
Eric：都係憑興趣！因為跑步嘅人有一個特點，就係唔需要太刻意了解對方，只要係一齊跑步，互相打個招呼，自然就會開始熟絡。
Joe：最重要係會員嘅參與度。因為就算我地諗出一個幾咁天方夜譚嘅活動，只要會員肯參與，有回響，自自然然外界就會覺得呢個跑團有少少唔同喎，於是就會有更多人去了解我地。譬如我地先前嘅「環澳接力賽」，當日我地嘅會員亦喺接捧區組織補給站，準備飲品食物，亦有車隊以備不時之需。全部都係我地自發嘅，冇任何資助，純粹想比賽辦得更好。賽後就將經歷分享到面書，使外界對我地嘅印象更為深刻。
記：你地嚟緊會有咩活動舉辦？
Eric：嚟緊我地會舉辦一個澳門版嘅「箱根接力」，係參考日本嘅同名比賽。大致上係分四個人一隊，每人跑五公里，途經大橋、小潭山等，我地會根據會員配速，所以每隊實力都差唔多，令比賽更具競爭性。
記：跑團除咗會內舉辦比賽外，仲會點樣向社會推廣跑步文化？
Joe：我地曾協辦過「明愛慈善跑」，並派出會員潛伏喺賽事中，時刻留意環境，鼓勵同扶持當中嘅傷健人士，使佢地都能夠感受跑步嘅樂趣。
記：你覺得政府可以有咩支持畀到跑步呢項運動？
Eric：本地跑步徑暫時只有松山、氹仔單車徑較為正式，其他就係一啲路跑徑，較近車道，始終有一定危險性。運動場而言，澳門半島只有蓮峰球場，氹仔嘅奧林匹克和科大球場亦唔係長期開放。所以我覺得澳門需要更多跑步健康徑、運動場。
Joe：本地賽事仍然較少。銀河馬拉松越嚟越難報名。希望可以多啲賽事，令跑手嘅目標更為清晰。
Jen：銀河馬可以考慮將多啲澳門世遺景點納入路程中，對推廣旅遊會有幫助。
記：有咩想同廣野嘅讀者講？
Eric：想跑步嘅朋友就搵我哋！
Gloria：我喺跑團中感覺到家嘅温暖。
Jen：有跑友一齊努力，就可以有更大嘅進步。
Joe：跑步如人生，有高低起伏。但只要肯跑，就會有前路。
（訪後餘記：近年跑步已經成為咗澳門人生活嘅一部份，我哋不時會見到身邊親朋好友將自己嘅跑步經歷分享到社交網站，每逢十二月頭嘅面書、微信朋友圈更會被馬拉松賽事「洗版」。Run Plus不僅係推動跑步呢項運動，更係推廣緊一種跑步文化。澳門嘅朋友，今日你跑咗未？）
本文原發表於 廣野 Speaking (記：阿賢 攝影：Isaac)，已獲授權轉載。
原文網址：http://www.macauspeaking.com/?p=1328
更多：
Fitz.hk Facebook專頁
包青天第69回《夜審犯婦人之怒洗烏盆》— 記香港街馬2016
好想同你瘋狂跑5k之羅. 莽. 陣!
Fitz.hk Running 跑步
由港九新界，以至地球每個角落，為你搜羅郁民好料，一一呈現大家面前。
