Fitz > 運動 Sports > 跑步 Running > 說好了的「跑步慳錢」呢?

跑鞋最近,有唔少身邊嘅姊妹都話想開始跑步。練跑原因人人不同,但好奇怪,佢地都不約而同講咗一樣野:跑步可以慳錢。

其中,精打細算嘅朋友Q條數係咁計嘅:佢前年join咗健身中心,平均每星期去玩三日跑步機。簽兩年約,每個月會費支出:$200幾。相比之下,依家佢自己跑街,同樣係每星期出去跑三日。每月支出:$0。表面上,月慳$200幾,一年埋單就慳over $2400。

曾幾何時,我條數都係咁計。但世事嘅野邊有咁著數呀?

以前去做gym,著件dri-fit tee加運動褲加波鞋去就可以。做完運動自然就換番返工衫番屋企。冇咩extra野要俾錢。

跑街唔同,起碼「裝備」都多啲。腰包、太陽帽、太陽眼鏡、太陽油等等。再加上,我發覺好多跑街嘅人打扮都有花下心思,有啲由頭到尾襯哂色咁。而我,本住「要贏人,先要型自己」嘅信念,又點會忍到手唔買呀?

衫只係少事,鞋先係深潭。跑街個地下rough過喺gym部跑機,鞋自不然蝕得快,換得快。(藉口!)

唔係誇張,我曾經聽過有師姐買鞋買到要「孭債」。唔係錢債,而係跑債。「我每對鞋可以跑400km左右。買下買下已經有1200km係屋企等緊我,要還咗條數先再買得啦。」

除此鞋之外,paacing都好重要架。跑機就話會track住啫,跑街冇架。所以,唔買隻GPS錶mon住自己個均速又點有進步呢?(藉口 x 2)

就係咁,我到半年就敗突咗「慳」番黎嗰$2400。如是者,跑步幾年至依家,我都唔知用突第幾個$2400。

朋友Q跑步慳唔慳到錢我唔知。我淨係知道,同朋友Q傾計時我又唔覺意買咗對Wave Rider 18、一條2XU同埋一件Under Armour 背心。

噢,屋企個櫃又爆咗。

更多:
為咗加碳,你可以食到幾盡?
Karena其他文章
Fitz跑步文章


文章為作者意見,不代表Fitz立場。