緣起
忘記了是第幾次參加星期三鐘樓的團跑，雖然起步時間很晏，有時放得工嚟，都要仆到去老尖。係文化中心換完衫，已經身水身汗。從文化中心行去碼頭時，前面出現兩個紮馬尾﹑穿Gyakusou sports bra同短褲的跑女背影，身型fit到痺，即時令我想起氣質美女張鈞甯。會不會跟她一樣漂亮呢? 定係上天是公平的?
上天對跑步女生就是這樣不公平，已經比佢一副索爆身材 (其實是辛苦鍛練出來)，再要給她們標緻的樣子。就是要讓一眾巴打死在她們手上。
毒L問: 「真係似張鈞甯?」
「驟眼睇，同Tokyo Girls Run的大杉亞依里撞哂樣。」毒L說:「未聽過，AV女優嚟架?」
註: 大杉亞依里PB是3小時43分。
「呢到有Wi-Fi，你自己Google一下啦!」
遠距離觀察，她的神態和動靜有點像上一個世紀經典日劇「戀愛世紀」的理子，我想像她同樣擁有不做作、爽朗和率直的個性。咁橋佢個FD又有啲似TGR另一成員梅本静香，身材一樣令人噴血。
註: 梅本静香PB是3小時57分。
柒到極致的Pick up Line
我走上前問她們邊度bag drop。静香指著星光行那邊，話有架貨van泊咗係度，有人幫手寄存隨身物品。返回鐘樓時，剛開始熱身，我走上前講唔該哂並乘機打開話題。
「妳哋成日嚟來架?」
「同你一樣啦。」静香露出寸嘴港女本色。
「我叫阿七，妳係?」
「我叫羅太。」我的心即時沉了一截。「咁呢位係乜太？」我望著亞依里問道。
羅太搶著代答「佢未嫁嘅，佢嚟跑步，唔係嚟識人。求其叫佢如花得架嘞。」
「阿如花好熟口面，唔知邊度見過呢?」我繼續搭訕。
羅太又搶答：「如花每日都見到好多人，佢係油麻地性病診所做護士，你係咪去睇過症呀?」
亞依里用手肘撞了羅太一撞，微笑地跟我說: 「我叫阿Gwen，我唔係護士。」
是時侯起步，羅太話: 「我哋跟Wendy跑第二組。」
>
「我都係跑開五分披。」我邊跑邊說。跑到西九，停下來休息，看看手錶，點止五分披，明明係開四分四十，唔怪得知跟得咁辛苦。返回鐘樓做stretching，阿Gwen索完8K之後，望落仲索。她沒有人魚線，但小腹好平，腰肢極纖細，丁點兒love handles都沒有。跑女來講，阿Gwen算是偏瘦的。
回貨van取回gym bag時，我要把握最後機會抄牌。我要先走，我拿出手機問阿Gwen: 「不如add妳的FB或者IG? 」
羅太又搶答:「我哋用Nokia。」
「咁電話有啩?」羅太西口西面話: 「同你好熟呀？下次話你知啦。」
好無癮之下，我只好問阿Gwen: 「下星期妳會嚟架可?」阿Gwen笑而不答。
這是我見過最甜美的笑容。
更多：
Fitz.hk Facebook專頁
追不到的跑步女孩 (一)
一個「廢青」跑出全世界的故事
我的十大外國名人跑步女神
Yiu Kwong Chan＠Fitz.hk
Fitz Running 跑步
本文屬作者意見，不代表Fitz立場。
愛跑步同港式抵死廣東潮語，sub-4是終身志業，希望以文章和跑步結識朋友。
