[里約奧運] 男女子馬拉松賽道大拆解

香港時間8月14日下午8點半，我哋嘅代表姚潔貞就會出戰奧運女子馬拉松。唔少跑友已經搵緊睇直播嘅方法，既然TVB播唔播大家都估唔到，不如研究下條賽道先。

賽道嘅資料，奧運官網欠奉，佢哋只係有份觀賽資料（Spectator Guide）俾大家參考，好彩外國有熱心網友，就用虛擬地圖技術畫咗幅超詳細嘅路線圖：

路線由森巴廣場運動場（SAMBÓDROMO）出發，跑5公里到海邊，然後沿海邊一條長約10公里嘅路跑3圈，大概30公里。最後跑番7.2公里返運動場衝線。

此外，佢哋仲計到呢條賽道一共有25個彎，當中包括5個180度髮夾彎。咁算唔算多彎呢？佢哋就話之前有統計過其他馬拉松賽事，多過90度嘅彎，柏林有17個，芝加哥有31個，波士頓就只係得3個。

至於坡幅問題，最初呢班電腦怪傑睇衛星圖，發覺坡幅超大！但細心睇實景圖，發覺出現極大偏差，估計係里約多山、多高樓有關。最後佢哋發現，呢條奧運馬拉松賽道，可以用六個字形容：

平坦！平坦！平坦！

咁係咪代表易跑，姚潔貞有望破香港紀錄呢？當然唔係啦！因為里約熱內盧嘅天氣不能忽視：

1. 天氣熱：奧運最初幾日，日間氣溫超過25度，如果當日萬里無雲，當地朝早9點半起步，就要喺烈陽下作賽。
2. 大風：賽道有成30公里要沿海而跑，而呢幾日海邊風速達到20-30公里，跑手要同風對抗。

其實潔貞亦已針對賽場嘅情況，專登去到紐西蘭進行最後集訓，希望佢會有好表現！

資料來源：Runner’s World、Sweat Science

更多：
Fitz.hk Facebook專頁
[郁民轉載] 澳門人與奧運的咫尺天涯
[里約奧運] #撐自己人 撐本土 香港划艇隊
[里約奧運] #撐自己人 撐本土 香港劍擊隊
[里約奧運] #撐自己人 撐本土 香港乒乓球隊
[人人奧運] 丹尼爾 x 黃蘊瑤 與鐵血女車神一盅兩件
[一個傳奇的誕生] 丹尼爾 vs 陳恩能 愛做有意義的事