Fitz > 飲食 Diet > 家有兩拳王—飲食篇

家有兩拳王之飲食篇_006好多人以為身為拳王,有一身精鋼骨骼一定對飲食好講究好揀擇。

但如果有「好朋友」同我地一齊食過飯就知道(唔熟的朋友面前佢地會收斂少少),我家的兩位拳王食野非常隨意,講得白D就係有得食就得。

佢兩個人食量驚人,情況直達10分恐怖級數,好似內置左兩個黑洞喺身咁,食極都仲會講:食晒都好似冇野落肚咁既?你唔係飽丫麻?我仲想食雪糕喎!不如煮多個公仔麵丫?

拳王一家一餐嘅食量 (應該係,除非唔係)
拳王一家一餐嘅食量 (應該係,除非唔係)

天呀,點解個肚可以塞得落咁多野?好多時我去街市買一日餸都要拎到成隻狗咁(有時迫於無奈要分兩、三次拎),以今日為例:一斤半牛肉、5塊雞排、3條栗米、2斤菜、兩包菇、6個橙、3個木瓜、兩磚涼粉、一罐花奶、一包黃糖、一pack雞蛋、一袋麵包、一包火腿、6包裝鮮奶。呢堆野淨係一日就可以清倉,最多日半就一定要補貨,仲未計超市買的零食汽水雪糕等,所以我每日都有做足夠的負重訓練,肌肉質素應該唔差的。

點解我仲未變排骨精?這就是愛的證據!我家的兩位拳王實在很愛我,所以有野食一定會跟我分享,深怕我食少啖都會餓親咁(其實我知佢地係想質肥我想我同佢地一齊操一齊減磅),我好耐都未試過有邊一刻會覺得「唔飽」,經常都處於好飽狀態,D野食未消化完又叫我食其他野,我又點會唔肥呢?!^^”

其實佢地食得多都唔係問題,問題係我辛辛苦苦搬晒D野返屋企後,又要被罰在廚房企足幾個鐘,不停咁洗野、醃野、煮野、整野食、跟住又洗碗洗煲,不斷重複⋯⋯人都癲!

出街食咪可以解決問題囉?係唔會的,每次喺街食完返到屋企都會食多餐,又係一樣要煮要洗,佢地係唔識飽嫁 T.T

更多:
家有兩拳王
[山野童樂] 小朋友行山 學愛惜生命


文章為作者意見,不代表Fitz立場。