疫情下多咗人去郊遊,行山用品大熱,行山鞋更係供不應求。其中一對最受歡迎嘅,就係 Topo Athletics MTN Racer 2,之前市面多次翻貨都掃清,有錢都未必買到,不過今次要開箱嘅,就唔係 Topo 嘅行山鞋,而係路跑鞋!

Topo Fli-lyte 4 路跑鞋

咩話? Topo 都有出路跑鞋? 無錯,其實 Topo 路跑系列選擇眾多,包括 Topo Cyclone、Topo Fli-Lyte、Topo Phantom、Topo Ultrafly、Topo Zephyr 等。今次我哋測試嘅,係 Topo Fli-lyte 第4代男裝,據網上資料顯示,男裝 US 9 僅重235g,屬於一對相對輕身嘅路跑鞋。

初步試穿

見過 Topo 行山鞋嘅朋友都知,Topo 鞋款一般鞋頭較闊,Fli-lyte 4 亦不例外,適合腳掌較闊跑者。網布面料透氣程度良好,唔會焗腳,不過頭幾次著上腳時,腳踭位置少少「刮腳」,建議穿著高身少少嘅跑襪。

實際測試

習慣了上腳感覺後,進行了一課50分鐘的10公里測試,其中最後3公里加速至 4’1x/km,整體回饋不錯,無太大「拖腳」感覺,加速反應合格。若與其他路跑鞋比較,Fli-lyte 4 並無 Nike Zoomfiy 一樣高回彈,但反應相對自然舒適。由於前後鞋踭落差只有3mm,令到中掌感覺較強,鞋底厚度亦不會影響「路感」。

論舒服程度, Fli-lyte 4 比 Nike Pegasus 系列更高,幾乎不用「開鞋」就可以落場。

評價

作為練習鞋,Topo Fli-lyte 4 表現綽綽有餘,闊身鞋頭及鞋楦尤其適合厚腳掌/闊腳型人士。如果腳掌較窄朋友,建議配搭厚襪穿著跑步,以防腳掌在鞋內「浪」得太緊要。作為比賽鞋,Fli-lyte 4 就感覺相對有點「包裹」著足踝及反應較慢 ,但新手或長課練習就沒有問題。另外如有需要,可改用扁身新鞋帶將鞋綁得更緊。

推介: 適合重磅型及輕微扁平足跑手。


文章為作者意見,不代表Fitz立場。
歡迎投稿: http://fitz.hk/contribute/
首頁 > 裝備 Gear > 開箱實測.Topo 路跑鞋 Fli-lyte 4