英國係歐洲疫情下死亡率最高嘅國家，唔少當地專家估計，其中一個潛在因素同肥胖以及其相關疾病有關。多個英國媒體報道，英國已準備好緊急行動，推出新措施去應對國民肥胖問題，以減輕疫症再度爆發時嘅殺傷力。
英國64%人口過肥
英國首相約翰遜 Boris Johnson 於4月感染病毒，而呢位首相一向被認為過重。據當地媒體報道，當首相「死過翻生」後向病毒下戰書，其中一個方向就係從改善英國人肥胖問題著手。
用 BMI 數值去衡量，英國有64％ 成年人被歸類為超重或肥胖，係歐洲最高水平。肥胖所帶來嘅慢性疾病，包括二型糖尿，令患者更容易感染武肺病毒。
英國有官員指，政府決心於三至四個月降低國民BMI水平，以求令國民可抵抗病毒。
禁止垃圾食物提供折扣
當局推行嘅措施，包括兩大類:
- 透過現有醫療系統NHS，加強國民健康飲食及健康生活宣傳，例如制訂健康餐單，和推廣全民運動
- 禁止商人為垃圾食物提供折扣，例如超級市場售賣嘅糖果，唔可以「買一送一」，希望減低市民購買垃圾食物意慾
專家: 有姿勢無實際
對於英國呢啲新措施，唔少專家都覺得解決唔到問題:
- 英國長久以來嘅肥胖，並唔係食少一兩筒糖可以解決到。更何況「禁止垃圾食物提供折扣」，未必阻止到大家食少啲糖
- 政府用BMI去評定肥胖與否，根本已經用錯標準。肥胖與否唔止睇體重，更應該考慮血糖、體脂等多個因素
- 英國喺呢個時候推行 Eat Out to Help Out Scheme，政府喺某幾日，會幫國民支付50%用餐開支，希望振興當地餐飲業。有專家批評，政府一方面叫人食少啲垃圾食物，一方面市民又可以用半價食 Burger King，超級矛盾。
肥胖問題，其實無論有疫無疫都應該正視，呢次疫情確實令人明白，追求健康生活，堅持健康飲食，以及維持適當體重，真係非常重要。
資料: 英國衛報、Business Insider
講求綠色、環保、天然的健康生活。推廣新一代健康生活文化。
