谷奶究竟係咩一回事? 男人從來無從得知，呢種同嬰兒間親蜜嘅苦與甜都係媽媽獨有，不過有一套能夠將谷奶呢種感受俾男人近乎感受得到嘅電影，確實係不可多得。
講緊嘅就係《TULLY》(論盡爆煲媽咪) 呢套電影，由《Juno少女孕記》嘅編導班底製作，借八卦雜誌講法，係繼續「孕味濃」演出，不過今次主角就唔係年輕未婚媽媽，而係金像影后查莉絲花朗，增肥35磅去飾演頹媽角色。
佢面對有特殊照顧需要嘅囝囝，本身已經身心俱疲，然後再迎接 NEW BORN BABY，加埋「得把口」嘅老公，一個湊三個連老公又點樣會拆得掂？喺呢個時候，有一位年輕夜班褓母就好似超級英雄咁，一夜降臨解決所有問題，就連兩夫妻性關係都因為佢教路而大躍進，咁最終係咪 HAPPY ENDING? 就留返俾大家睇。
不得不提係一場精彩酒吧戲，兩個女人一老一嫩，出城劈酒狂歡，跟住女主角谷奶谷得非常痛苦，係要即刻搵廁所鎖門去放返出嚟嗰種，呢種狠狽同束縛相信只有媽媽先至明白，但畫面呈現嘅身體反應已經足夠令男士設身處地感受媽媽之苦。
人生又何嘗唔係咁，有啲時間越掙扎越狼狽，喺心口谷住無能為力嘅感覺，香港人應該感受好深。網上都有唔少外國社會實驗片段，將低胸裝女士同當街餵哺母乳嘅媽媽做對比，唔少人路過俾嘅反應都係前者性感、後者噁心，更加唔好講喺香港唔少地方逼媽媽去廁所餵奶，所以呢一幕谷奶谷到入廁所解決真係諷刺兼到肉。
兩位女角最後仲帶出美滿家庭係咪就係人生終極目標呢個 GENDER ISSUE，不論你點諗都好，電影都做到，回歸阿媽係一個人而唔係一個超人嘅角度去睇女性壓力，描寫得細緻精彩。
最後要提係音樂方面，承傳 JUNO 少女孕記正到要買 SOUNDTRACK 嘅水準，而且在於唔覺唔覺又聽咗一段，劇情片都做到睇 MV 嘅感覺，自然係非常流暢。亦都回應電影所講，人嘅大部分感官都有階段性嘅改變，唯獨聽覺係人出生而來都保持咁原始。
戲名「論盡」語帶雙關，一個病童母親再迎接新生命嘅故事，落地又奇幻，連男士都能體會「谷奶」滋味，係家庭入場首選。
*參加 AIA VITALITY ，行得多換得多，免費戲飛隨時有，欲知詳請，可電郵聯絡
Fitz 連結: https://fitz.hk/?p=98217
Fitz Facebook專頁
[行多步．睇多套]《日出前讓戀愛開始》愛情本身都是一種絕症
[行多步．睇多套] 《給我一個道歉》 法律不外乎國情
[行多步．睇多套] 莫莉遊戲 Molly’s Game 做人最緊要邊個心: 鬥心? 貪心? 良心?
空手道的麵與飯
Fitz Life 生活
熊重任 — TED TALK迷，醉心研究自我管理、運動與心理，工作與動力的課題，希望科學化改善個人生活，亦係一個極愛睇戲嘅算死草保險經紀。
