近年來,著名嘅山陰景點不外乎米子、鳥取兩大城市。今次有幸參加「國寶松江城馬拉松」,就一於順路發掘島根縣較少人熟悉嘅「松江市」及「出雲市」。松江市位處日本中西部地區,亦都因為臨近海邊關係,蟹產獲豐富,今次嚟到點都一定要食一餐蟹宴。

第一日到埗,島根縣接待 Ayako 小姐已經準時喺抵達大堂等候我地。經過一輪簡單認識後,Ayako 就隨即駕車45分鐘到松江市內酒店讓我們休息。咁啱抵達酒店時間接近黃昏,入住嘅酒店鄰近穴道湖,站在180度湖邊的一角,凝望住夕陽慢慢下沉,更感受到松江市寧靜嘅一面。隨著夕陽的落下,眼前有幾位穿著運動裝扮的市民跑過,相信佢地都係為聽日嘅馬拉松比賽作最後熱身。呢個時候,我嘅靈魂同集中力已經被 FamilyMart 嘅熱辣辣小食吸引左去。相信大家無論去幾多次日本都好,日本嘅便利店總係有一種無法抵擋嘅吸引力,就算餐餐都係便利店,想食嘅食物都係會食唔完。

每去一個日本城市,都一定會去探訪當地城內嘅天守,因為每座天守都各有特色。然而嚟到松江市,就一定要探訪「松江城」。原因係松江城天守係現存日本國寶之一,亦係山陰地區唯一現存天守。由停車場步上天守入口大約需要15分鐘,沿路經過興雲閣,係一座較為歐陸風嘅茶室,再經過一小段紅葉樹路後,踏上數十級石路,就見到松江城真身。

由松江市駕車向西出發,大約45分鐘就會到達出雲市嘅「出雲大社」。黎到山陰地區就一定要嚟出雲大社。此社素以「結良緣」聞名,而且建築風格都較其他大社特別。大社最吸睛莫過於在神樂殿正門前的注連縄,仲聽講喺到求「結良緣」嘅成功機會率都幾高,有心人士必定要黎探訪。

另外值得一提,日本跑界耳熟能詳嘅 Ekiden 大學驛站接力賽其中一站就係「出雲大社」正門前出發。每年嘅10月,都吸引左一班黎自日本各地嘅大學跑手,嚟到一較高下。

出雲市除咗「出雲大社」外,我覺得出雲日御燈塔都係一個好值得去嘅景點,由大社駕車大約15分鐘,就會去到近海嘅燈塔。如果行程許可,建議大家可以安排日落時間前往。出雲日御燈塔嘅其中一個賣點就一係,可以係一望無際嘅水平線上,慢慢睇住夕陽落下,而萬里星空會緊隨出現,同一個地方,兩種享受。可惜今次嚟到天氣不似預期,無緣欣賞到這份美景。

嚟到三日兩夜島根縣最後行程,就一定要試埋最出名嘅蟹宴。係市內嘅大街小巷,總有一間蟹嘅食店在左近,而且價錢一定比起係香港更平。於是就隨便行入一間食蟹嘅店,留意到大部份食店都會將蟹宴分為三款套餐價,大約為HKD$600、$900及$1200,分別在於吃蟹的份量多與少。最後我地食左$900嘅套餐,對於食蟹嘅份量十分滿意,大概有10道不同款式嘅蟹食,而且所有款式都超級新鮮和鮮甜,呢個價錢,呢個質素,簡直物超所值。

國寶松江城馬拉松大會網頁


文章為作者意見,不代表Fitz立場。

歡迎投稿: https://fitz.hk/contribute/

廣告