間中都有人問我,”玩Parkour唔驚仆X咩?”,又或者有人覺得玩呢樣運動唔知驚,唔知危險,心裏面唔驚死。但其實只係踏出左自己 comfort zone。

有次搭港鐵,月台上其中一個月台閘門要維修,所以有個空位。當冇咗閘門保護,望落好危險,好似一叉錯腳就會跌落路軌咁,比列車輾爆。但係曾經,不論地鐵定火車都冇閘門、幕門,啲人又咪係一樣咁返工返學,一樣咁生活。再者,有閘門/幕門鐵路系統其實唔多,不論紐約、倫敦、巴黎、日本等已發展城市都冇安裝閘門。只不過香港人被”寵壞咗”,慣咗有道閘門之後,一冇咗個閘就覺得好危險。其實原先一樣平平無奇,好日常嘅事物,都可以因為長期受到保護之下,令對同樣事物既接受程度下降, comfort zone 就會越嚟越窄。

你記唔記得,曾幾何時你仲係小朋友個陣,喺公園度跑跑跳跳、周圍爬? 大個咗做咗成年人,忽然覺得呢樣野好幼稚,所以就停落黎唔再做,唔再係公園度爬黎爬去? 因為覺得打波、跑步、做 gym 成熟啲? 當你耐咗冇周圍爬,要你做返個陣,就返轉頭話呢樣野危險? 或者因為 comfort zone 窄咗,接受嘅程度降低左,要你做返個陣就話”我唔得架”、”我唔想仆死”……又唔可以叫懦弱嘅,最多話細膽。但如果只係識得留喺自己 comfort zone 面,唔敢行出黎,只會一直寵壞自己,當你受慣左保護,就會連原先你覺得唔危險既野,都覺得危險。


點都唔可以忘記我地其實係動物 (不過高智慧啲咁解),同樣有動物基本行走嘅本能,跨越唔同嘅障礙物。Parkour 正正教你重拾返呢種本能,而小朋友係公園跑、跳、爬亦都唔例外,佢地做個啲都係 Parkour。點解小朋友得,而大個咗嘅你又唔得? (除非你六七十歲長者) 當你重新學習呢啲動作,當然會驚仆X整親,但只要肯嘗試踏出第一步,踏出你嘅 comfort zone,努力練習,就可以克服恐懼,跨越心理同”物理” (physical) 障礙,超越自己。

想了解咩係 parkour? 可以睇番我之前嘅介紹《[極限運動Parkour] 飛簷走壁好貼地

NC Channel HK Youtube Channel
Instagram: @ncchannelhk

Fitz連結: https://fitz.hk/?p=111187


更多:
Fitz Facebook 專頁
[極限運動Parkour] 飛簷走壁好貼地

廣告
NC.Leon
熱愛運動,唔做運動會死,亦都鐘意嘗試新事物,所以試過好多唔同嘅運動,例如體操、跆拳道、跳舞、行山、田徑、閃避球、足球、健球等,不過令我最享受,最沉醉嘅係Parkour。透過parkour,我學識超越自己,克服恐懼。 希望可以有更多人認識呢樣運動,感受到當中嘅樂趣。