Fitz > 運動 Sports > 極限運動 Extreme Sports > [Parkour] 危險的謬誤

有唔少人都覺得 Parkour 好危險,界定為極限運動,危險性高。呢種諗法可以理解,但係種謬誤。

我相信睇緊呢段文嘅你,接觸到 Parkour 嘅渠道十居其九都係網絡世界。睇 YouTube, Facebook, Instagram……但有冇諗過你睇親嗰啲一係就跳天台,一係就 Fail 片。而流傳得到你手上嘅影片,一定係點擊率高、多人 share,因此容易以偏概全。而點擊率高嘅片多數都係睇到你驚,又或者係 “睇人仆街最開心” ,咁啲人先會 share,咁你先睇到,唔通走去 share 你個仔喺公園跳嚟跳去嗰啲片咩,都冇人睇啦。所以你就覺得 Parkour=跳天台、Parkour 會仆街、Parkour 累人累物。再加上一旦相信咗Parkour係危險,基於確認偏誤 (Confirmation bias) ,就會認定咗 Parkour 係危險,難以改觀。但咁只係睇到 Parkour 其中一面,睇唔晒全部。

好多人誤會,Parkour 進行嘅場地係喺天台,但冇諗過小朋友喺公園玩都係 Parkour。的而且確係有人會跳天台,但係你唔可以一概而論,話 Parkour=跳天台,因為絕大部分訓練嘅地方都唔會上天台,反而係日常生活經常見到嘅障礙物。

呢度仲有個天大嘅荒謬添:

Parkour 有人死傷就會覺得係扺死,自己攞黎,累人累物。相反,馬拉松有人死傷,又唔會有人咁講危險架喎。每年依然有成萬人參加渣馬,早兩年仲跑死咗人,又唔見有人話 “跑步好危險” 嘅?

其實危險嘅並唔係運動本身,而係參與者。當你唔知道自己能力去到邊,又或者明知自己能力唔夠,係都要勉強,咁咪出事囉。姐係咩呀? 姐係不自量力呀。但係呢刻冇能力去做唔代表放棄,而係代表要加強訓練,裝備自己,有思考、反思同按步就班咁去訓練,迎接新挑戰。

Parkour 對好多人黎講係感知上危險,因為唔相信人嘅能力可以好似動物咁跑跑跳跳。諷刺地,人本身就係動物,係與生俱來,呢樣係動物嘅本性,並唔能夠否認 (咁亦都解釋到點解小朋友總係鍾意爬嚟爬去)。Parkour 嘅哲學就係教你知道自己能力去到邊,要量力而為,而唔係 “盲目地大膽” 。反而要計過度過,配合埋生理同心理質素先去做。

小編按: 小編係凡人,所以呢篇文仍歸類係「極限運動」。小編相信,在足夠的訓練以及做安全措施之下,極限運動亦並非搵命搏。

NC Channel HK Youtube Channel
Instagram: @ncchannelhk

Fitz連結: https://fitz.hk/?p=117552


更多:
Fitz Facebook 專頁
[極限運動Parkour] 飛簷走壁好貼地
[極限運動Parkour] 走出舒適區超越自己
Fitz Extreme Sports 極限運動


文章為作者意見,不代表Fitz立場。