YouTube 有條講單車裝備嘅短片,有成超過200萬點擊,不過就並唔係開箱文,而係片主講述因車架折斷而受重傷嘅經歷。

話說 Joe Damois 上網見有款叫 VeloBuild 嘅29吋 “29er” 國產碳纖單車好平,於是就買咗部返嚟。開頭測試都感覺唔錯,但當佢第一次帶佢落山,跳過一個細山坡時,車架突然折斷,導致左腳嚴重骨折。

事實上,只要去 YouTube 或 Google 行返轉,都會搵到大量碳纖單車架折斷嘅文章同短片。

其他碳纖單車架折斷嘅情況

劣質碳纖車架為禍美國

美國每年有數百宗涉及外國製單車嘅民事索償案件,部份甚至鬧上法庭。近年有律師行更成立專屬團隊,處理呢類碳纖車架意外,為苦主追討賠償,當中最受關注嘅係台灣生產商 Giant 案。

呢宗發生喺2013年嘅事件,事主喺芝加哥踩住部 Giant 出產嘅碳纖公路車 OCR C1,喺完全無任何碰撞之下,前叉從內部折成兩半。事主撞上行人路,頭部、脊柱及鎖骨嚴重受創。

美國嘅 Giant 分銷商否認意外係佢地責任,不過亦願意同事主和解。翻查Giant官方網頁,佢哋一共八個生產基地,六個位於中國大陸,一個位於歐洲 (只生產歐洲分銷嘅產品),一個位於台灣總部 (生產及研發高科技產品)。可以依此估計,除咗喺歐洲買到嘅 Giant 外,全球絕大多數嘅 Giant 單車,都係中國生產。

圖: Giant官方網頁 截圖

碳纖維硬淨但好脆弱

碳纖維 Carbon Fiber 係一種高強度及耐高溫嘅化學纖維,主要由碳原子構成。利用高科技生產方式,將幾千條碳纖維集束成一個纖維束,令其可以單獨使用或被編織成織物。碳纖維具有好突出嘅優點:

  • 高硬度
  • 重量輕
  • 高耐化學性
  • 耐高溫及耐低溫

不過,碳纖維比起鋁、鋼等金屬亦有好多缺點,除咗價錢昂貴,就係碳纖維缺乏金屬嘅彈性。即係話,佢雖然堅硬,但一遇到大力度撞擊,或纖維有缺陷時,就會一下粉碎。如果有留意F1賽車,就會發現以碳纖維製嘅賽車車身,一有碰擊並唔會凹陷,而係完全粉碎,無得整,只可以將撞爛嘅部份換咗佢。

F1嘅碳纖車身,一經高速撞擊,會即時粉碎。

所以,因為碳纖車架出意外嘅 Joe,就話以後寧願用較重嘅鋁車架,都唔會用碳纖。因為鋁架遇有碰撞最多只係彎曲,唔會成個斷開。

「中國的會爆炸 」?

「中國的會爆炸 」當然純屬網上笑話,劣質產品邊到都有。而碳纖維質材因為涉及高度技術製造,品質需要嚴密監控,萬一製造時有疏失,容易令產品出大意外。

呢款大陸產碳纖單車報價¥3890-5290,平過外國品牌好多好多。

美國單車品牌 Specialized 嘅碳纖維單車,標榜材質都由自己廠房出產,以保障佢哋品質符合安全標準,其他高端品牌相信亦有類似要求。至於我哋上大陸購物網見到幾千蚊部嘅碳纖單車,喺生產以至運送上可唔可保證品質,實在令人疑慮。

資料: OutsideNPR、維基百科

首頁 > 運動 Sports > 單車 Cycling > 中國的會爆炸? 劣質碳纖單車架可致嚴重意外