有唔少朋友成日同我講話想平平地買部入門公路單車試下，叫我幫佢留意，當我同佢講，你最少預$3500 budget 嘅時候，就會即刻好似覺得我係離地二世祖、認為我唔知米貴果個表情，同我講「我真係唔使玩到咁勁架。。。」。
呢啲朋友有一半係得個講字，兩年之後都仲未買。另外四份一會卒之買部兩千蚊嘅垃圾，踩兩踩覺得辛苦，然後放喺度，最後果四份一會跟我建議買。
Note：如果你大把錢，大把地方，又唔喜歡用二手嘢，咁你可以唔駛睇呢篇文。
DEMAND & SUPPLY
我唔講理論，講經驗。
新手入門買車首要原則：買二手，睇回收價。
呢兩年香港單車潮，需求突然大增，令二手價格企得好硬。其實好多人都好闊佬，買完部新單車返黎踩兩次，放喺屋企嫌阻埞，然後就會上網放咗佢。所以喺網上搵到一部比新車市價平一半，但又新嘅一樣的單車一啲都唔難。
小弟當年初初踩車，睇中咗部舖頭價值$9000，折咗都$7900嘅GIANT TCR2. 我係咪好有米？唔係。我極Cheap。
點解揀呢部？因為我發現GIANT係新手神物，好多人第一次踩單車，都會選擇GIANT或者Merida等台灣大牌子，但通常第一部車都唔捨得買咁貴，所以二手需求極高，價錢亦高企。
GIANT 公路車有兩個入門型號，SCR同TCR, 數字越細越高級。兩部車都係回收價極高，網上二手市場亦耐唔耐會有好嘢。
簡單比較：
SCR1（鋁）－ 9.5KG 平、靚、零件低級、無咁好踩。
TCR2（鋁）－ 8.5 KG 貴啲、靚、件高級啲、比較好踩。
兩款車回收市場都非常好。
於是我就用咗少少耐性，等咗部白色TCR2嘅出現。
就係呢部衰仔，我叫佢做『白色奀星』。
記住記住記住： 諗回收市場
我並唔係特別鍾意白色，不過好多香港人鍾意。
當年我用$5000買咗呢部狀態極好嘅單車，開始我嘅公路車旅程。。。
>
話咁快，轉眼間已經一年，我有盡我責任好好保養部車，而我已經升級新歡碳纖維，而舊愛就當然要跟從計劃地離開啦。
於是，我放番上網，成功以$5000賣出。
唔係好彩，完全係預計之內，我唔敢擔保你可以有錢賺或者平手放，但係你一定唔會蝕好多。相比之下，以$2000買部垃圾然後放棄嘅朋友，佢哋嘅成本就好貴。
所以凡事唔好睇表面，買咩都好，本身價值幾多都好，都唔係叫貴，因為所有嘢都有個回收價，本身價值減回收價先會知道部車貴唔貴。
如果你而家問我（2015年1月），入門公路車應該買邊部? GIANT SCR1 2014年款或以後，budget $3500
最後我嘅意見係：做功課，睇市場，買二手，諗回收，好好驗車，好好保養，比啲耐性，小心踩。
(相片由杜光庭提供)
