[和你踩] 十八區單車徑有無得諗?

區議會大洗牌，好多人對未來滿懷希望，對自己社區亦好積極提出意見。有單車友就話想全港十八區大建單車徑，仲要區區互通。

呢幾個月來，香港人經歷過港鐵突然封站，交通燈損壞無人整，巴士班次話改就改，唔少人開始醒覺，既然可以「和理返工」，點解唔可以「通勤踩」呢?

香港單車徑問題

長遠以來，香港由政府以至市民，都對單車及單車徑有一套既定態度，加上香港獨特嘅問題，令「通勤踩」發展有一定難度:

1. 汽車司機覺得單車「阻頭阻勢」: 雖然政府列明單車係「道路使用者」，單車可在一般道路上行駛，並有權佔用一條行車線。不過，呢啲喺汽車司機口中嘅「路權L」行得慢又阻住條路，汽車司機對單車友普遍甚為敵視。加上香港道路極之繁忙，單車要行走馬路往往甚為不便，
2. 政府視單車為康樂休閒活動，興建嘅單車徑都係以呢個方向規劃，就算令單車友十分期待嘅「超級單車徑」，都只係一條橫跨多區嘅長途消閒單車徑，並無經過繁忙市區，對於以通勤為目的嘅車友無甚幫助。
3. 地區人士亦覺得單車可有可無，最明顯例子係將軍澳嘅澳景路，被當區區議員 (已落選) 落閘封閉，禁止單車進出。荃灣至屯門一段單車徑又因當區居民反對，興建計劃一拖再拖，所以就算區議會大變天，要扭轉呢啲反對力量亦甚為艱難。

外國經驗: 單車徑分為兩大類

世界各地嘅單車徑可分為兩大類:

• 分隔式單車徑: 好似香港咁，要大興土木，興建一條分隔行人同汽車嘅路線，指定單車行走嘅路線。好處係單車、行人、汽車三方面，各有各行，睇落好似好安全。(睇落咋，係咪真嘅呢? 睇埋下文)

• 開放式單車徑: 喺馬路行車線最近行人路一邊，畫多一條兩米闊左右嘅單車徑。好處係唔使大興土木，亦可以有彈性處理單車問題。問題係對於市內嘅交通有一定影響，例如巴士埋站慢咗，城市道路嘅車流亦因此而有阻塞。

事實上，倫敦呢一個有幾百年歷史嘅古城，要喺市內興建分隔式單車徑極為困難，所以喺繁忙地區，佢哋亦採用唔少開放式單車徑。經過多年推行，只要汽車同單車之間嘅默契多咗，居民亦開始採受單車於馬路上行駛。

十幾年前BBC紀錄片《Top Gear》，以單車挑戰汽車、快艇同地鐵，結果單車輕鬆獲勝。

分開行未必最安全

今年8月，財經雜誌《福布斯》報道一個大學研究，呢個研究主要想了解「分隔式單車徑」同「開放式單車徑」邊個安全啲。

正當一般人以為單車有單車行，汽車有汽車行，「分隔式」一定安全啲。點知，呢間大學做完研究之後，發現啱啱相反，喺「分隔式單車徑」踩單車發生意外嘅機會比另一種多25%。

有關專家估計，單車友喺一條封閉式單車徑上踩車，往往更容易分心，而且呢一類單車徑亦有好多對頭單車，比起馬路大家行走同一方向，會發生更多意外。

所以，開放式單車徑其實都好適合香港呢個城市。特別係當汽車同單車要互相尊重，互相禮讓，單車亦有機會成為大家必需嘅交通工具。

資料: 福布斯、連登討論區