Fitz > 運動 Sports > 單車 Cycling > [武漢肺炎] 英國政府花180億 推廣單車代步
英國首相 Boris Johnson 未中武肺前,都以單車代步

疫症大爆發,世界不一樣。唔少國家要面對維持社交距離,但又想恢復經濟,英國就因為咁,既想有國民返工放工,又唔想公共交通過於擠逼散播病毒。咁嘅情況之下,英國政府計劃撥款20億英鎊 (約180億港元),推動國民以單車代步。

Grant Shapps

英國交通大臣夏普斯 (Grant Shapps) 指出,現時理想嘅社交嘅距離為2米,喺咁嘅距離之下,公共交通工具嘅容量只有過去10%,如果唔諗其他方法,根本不足以應付國民日常出行。

相反來講,踩車出行嘅人數呢30年來一直只佔全國人口1%。防疫以外,踩單車亦更環保、更健康,值得政府大力推廣。

呢20億英鎊嘅開支,主要涉及幾項重要措施:

  • 改良現有道路,增加「彈出式單車徑」(pop-up cycleway)
  • 在鬧市之中加設更多單車徑,除咗可容納更多單車族,亦有利發展舊區
  • 發放單車修理現金券,鼓勵民眾維修舊單車
  • 研究使用電動單車嘅可能性
  • 與 Google、微軟、Citymapper 等軟件開發商合作,以科技改善交通擠塞
  • 於英國境內開發至少一個「零排放城市」,在市內禁止使用石化燃料嘅汽車行駛。
疫症加重了公共交通嘅負荷
「彈出式單車徑」 (pop-up cycleway) 可隨時搭建或拆除,以應付不同時候嘅交通需求。

英國政府希望5年之內,踩單車及步行出門嘅人口,比而家增加2倍。歐洲各國已經大力推廣單車,成為文明城市不可或缺嘅交通工具,反觀香港,相信有排都未有呢一日。

資料: gov.ukForbes