網上流傳呢張圖片,有電單車司機話想去萬宜水庫睇日落,點知去到北潭涌閘口,唔畀入,嬲嬲豬掉頭走。

不過眾所周知,郊野公園範圍係車輛限制區,公眾車輛 (無論幾多個碌) 係要申請先可以入去。呢位鐵騎司機可能要溫下書,睇多幾次《道路使用者守則》,佢咁樣揸車出街其實幾危險。

北潭涌閘口,廿四小時有職員駐守。

閘口無職員都要小心

根據東網報道,唔少郊野公園車輛禁區,唔似得北潭涌會有職員看守大閘,令市民有意或無意都闖入禁區,威脅市民安全。各位揸車嘅山友,就要小心以下呢幾段路:

  1. 金山道
  2. 大欖郊野公園 (雷公田鮮奶農場一帶)
  3. 城門郊野公園

上面呢幾處,有部份閘口長開,亦無職員駐守,有啲唔識睇路牌或者唔想睇路牌嘅司機,就會將汽車駛入禁區,影響郊遊人士。

雷公田入鮮奶農場之道路,有一段無閘口,但屬於禁區。

申請許可證守則

除咗專營巴士、小巴、的士、區內居民,以及官方單位,要拎到進入郊野公園嘅長期許可證,其實絕不容易。私家車想入郊野公園遊車河,一般嚟講都係唔批。

有以下原因,漁護署先會考驗批准私人車輛駛入郊野公園範圍 (通常係一日證):

  1. 旅遊巴士 (北潭涌閘口每日發30張)
  2. 商業或公務工作 (會盡量安排在非假日)
  3. 到區內探親 (據講到魚排釣魚BBQ嘅顧客,都可以拎到呢一種許可證)
  4. 學術研究
城門主壩閘口,通常上鎖。

所以,想揸部車入郊野公園遊車河,當局係唔會批准。而且漁護署喺申請書亦講得清清楚楚:

「公眾人士前往郊野公園遊玩時應使用“郊野公園內的巴士或專線小巴服務”,許可證只會在極為特殊的情況下,才會簽發給申請人作康樂用途。」

成功申請許可證嘅車輛,要將證件放喺車頭。所以,如果大家見唔到車輛有許可證,不妨致電 1823 投訴。有讀者更曾報料,試過深夜喺鉛礦坳營地聽到有人飛車,估計有人偷偷將汽車駛入禁區。

值得一提,某些水塘範圍嘅閘口同道路,雖然由水務署管理,不過如果路段喺郊野公園之內,漁護署亦有權抄牌,而有關告票,仲唔係定額罰款,係要上庭! (最高可被判處罰款2千元及監禁3年)

其實去得郊外玩,都係想接觸多啲大自然,呼吸下新鮮空氣,咪鬼揸車啦。

資料來源: 漁護署

Fitz 連結: https://fitz.hk/?p=97876


更多:
Fitz Facebook專頁
[#毅行問教室] 毅行信箱 解答你疑難
7件毅行者最想要的多啦A夢法寶
Fitz 行山 Hiking


文章為作者意見,不代表Fitz立場。

歡迎投稿: https://fitz.hk/contribute/

廣告
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。