登青山
呢張圖嘅右邊,就係青山寺。細心睇可以睇到登山路線及距離。 (圖片來源)

香港三尖,釣魚翁、蚺蛇尖、青山,各有特色。釣魚翁平易近人,可說係入門級。蚺蛇尖係登山界嘅神廟,一般人只能遠觀。至於青山,講路程屬三尖中最短,8成道路仲係石屎路,但因為斜度極大,可謂「好睇唔好食」。體能差啲都未必頂得住。

好彩中途可遊覽歷史悠久嘅青山寺,可以稍作休息。

  • 路線:輕鐵青雲站落 > 興才街 > 揚青路 > 青山寺徑> 青山寺 > 直上山頂 (掉頭)
  • 距離:約5公里 (來回)
  • 需時:1.5至2小時 (不計中途休息)
  • 難度:3星 (5星最難)

注意:

  1. 由山腳至青山寺的青山寺徑為石屎馬路 (單線雙程),中途亦有汽車掉頭處。真係扶老攜幼想一遊青山,亦可自駛或搭的士至山腰。
  2. 過咗青山寺之後,有「不准進入」的告示牌,可依山路而上至山頂發射塔。但路徑危險,小朋友老人家避免上頂。
青山寺入口。而青山禪院其實位於青山山腳。
青山寺入口。而青山禪院其實位於青山山腳。

青山歷史
屯門青山最見嘅記載,就係魏晉南北朝時代,有一位高人叫「杯渡禪師」,據講佢可用隻杯去渡海。禪師見到呢座青山好有靈氣,就係山上面坐禪,最後得道成佛。後人喺上址興建「青山寺」。而青山古時有人亦稱為「杯渡山」。政府發展屯門新市鎮,亦以「杯渡路」紀念呢位屯門偉人。

更多:
Fitz.hk Facebook專頁
[香港三尖] 釣魚翁
破邊花山萬柱岸
[270度九龍全境] 那夜凌晨,我登上了獅子山賞月
Fitz Hiking 行山