其實毒 又有咩好怕喎

初次接觸行山係2007年左右, 當時19歲, 印象中好似係睇左某套戲見到人登山自己又想試下, 咁咪問下D fd有無興趣囉, 不過身邊D朋友唔係打機就踢波, 再唔係唱下K好過啦!!

當時又未有Whatsapp, 無咁多group, 同埋好似無而家咁多年輕人會去行山, 不過網上D路線, 資料都多既, 咁就膽粗粗試下一個人去.

我唔會忘記我第一次行既係元荃古道, 亦都記得好清楚我阿媽話山上面會好凍, 要帶件褸, 當時係8月…咁我第一次行, 緊係信佢, 結果當然係%#&$&*(*^

點解呢個第一次會咁記得, 悶到爆!!! 係見到青馬大橋果下興奮過一陣, 之後行去元朗果下真係…又悶又長, 又無人同我傾下偈, 又無風景睇, 不過諗返起, 新手係行呢D架啦, 仲想點!!!

到第二次行山又係好記得, 因為行八仙嶺, 今次就嘩嘩聲, 呢D先係行山架嘛, 天氣又好又清, 果種氣勢 , 震撼真係不得了, 雖然都係單拖, 不過睇風景都睇到呆晒啦, 著晒迷, 勁滿足!

從此就愛上左行山, 一放假就去, 毒自走過大刀刃, 青山, 蚺蛇尖, 鳳凰山, 狗牙嶺等等等等……

到而家變到行山好似係年青人既一種潮流咁, 都有幸喺討論區識到D行山友, 所以而家基本上都好少毒自去行山lu, 一班人一路行一路有傾有講又別有一番風味既~最重要係有人幫你影相丫嘛, 以前係將部相機放喺舊石度自拍渣!!(而家gopro可以wifi連落電話度用電話睇住佢影緊乜, 恩物阿!!!我頭像就係咁影)

總結就係, 單拖同群體各有好處, 想靜靜欣賞風景諗下野咪一個人去囉(識有D人覺得一個人行動係柒, 而我亦都比人咁樣笑過), 鍾意熱鬧咪call齊人, 反正而家唔難結伴.

(利申: 無論多人定毒自偷歡, 萬事都要小心, 要帶夠水阿!!!!!!!)更多：
Fitz.hk Facebook 專頁
華山深度行
Fitz Hiking 行山