[山野童樂] 5項帶小朋友行山的心法

大概一年前，犬女同我第一次正式行山。當時帶佢由城門主壩上衛奕信徑。結果，佢行咗5分鐘嗌上車返屋企。(詳見《當美斯兒子討厭足球（行山版）》）

這次之後，我投入fitz.hk嘅編輯工作，在工作上認識好多山界奇人，亦吸收了好多人嘅親子行山心得。這天，我們決定，再一次去登山。

路線完全不值一哂，只是由大帽山道閘口，沿馬路行到山頂天文台，然後回頭下山。全程來回約4公里，我哋用咗差不多兩個鐘。而最重要嘅，就係女兒樂在其中，返屋企後隨即問我幾時再去。咁嘅結果，都叫做目的達到啩。

這次經驗，有很多地方值得與大家分享：

1. 路況
砂石路當然充滿郊野風味，但對犬兒呢啲乜鬼昆蟲都驚嘅小朋友嚟講，石屎路較為安全。而水塘引水道亦係不錯選擇。

2. 路線
唔好貪心，短短地就好。始終小朋友腳力唔會太好，阿囡雖則可以一口氣由閘口行上山頂，但落山已嗌腳痛。仲有係，最好係開揚地點，小朋友行樹林山谷，唔多唔少會驚。

3. 綽頭
至少有個主題／目標，可以等大家一齊完成。你話同小朋友爬上山睇海景，行一大段睇芒草佢哋未必有動力，呢次我就以「上大帽山篤波波」為目標，大家朝住天文台個雷達站個波波前進。真係唔覺就到。

4. 行山友
行山友相對而言較為有善，你可以好好教導小朋友同陌生人打招呼。而一般而言，迎面而來嘅行山友，亦都可以鼓勵小朋友加油。佢哋一句「小朋友好叻呀！」足以令嗰對小腳仔行多一公里。

5. 獎勵
唔一定要去麥當當或者玩斗城先叫係獎勵，去大帽山嘅話，落下面小食亭搵蓮姐食燒賣一樣令佢留下美好嘅回憶！

更多:
[山野童樂] 5條熱門親子行山徑
[山野童樂] 小朋友行山 學愛惜生命
[點都要到此一遊] 香港10大自然勝景
Fitz Hiking 行山