[毅行大叔] 何亨: 我要尋回我的毅行故事

由

家聯

2018-09-27

Fitz > 運動 Sports > 行山 Hiking > [毅行大叔] 何亨: 我要尋回我的毅行故事

Common sense is common: 參加毅行者，一定要搵班夾得埋嘅隊員，唔係你一定後後侮! 西貢至元朗100公里路，加埋操練嗰幾個月，隊員之間如果唔啱 channel，絕對令人氣絕身亡，吐血而死。

2006年，因緣際會下，我與一位叫何亨嘅電台同事，代表商業一台參加樂施毅行者，可說是一場惡夢。

嗰時嘅何亨，日日返工都見佢烏眉瞌睡，連放工都沒精打采。呢個人咁嘅狀態，又點可以應付100公里山路? 唔講佢毅行前嘅操練點樣甩底點樣令隊友泄氣，剩係講一件令我印象深刻嘅事。

當年KK陳國強會免費為有興趣參加毅行者的商業機構員工進行訓練。這年商台同事也邀得KK上山。相片大概攝於2000年，最右為何亨，旁邊是KK。

茅坪扭眼瞓事件

四位隊員入面，小師妹一早有腳傷，需要慢慢行。大家經歷過第一、二、三段後，整隊時間已經慢得不能再慢，臨近 DQ 邊緣。不過大家鬥志仍然好，仲希望可以喺日出前到達維維爾營 CP4，盡能力令大家不會被淘汰。

嗰時上到馬鞍山已經深夜時份，無兩點都三點。去到茅坪，派薑茶嘅黃伯已經收檔，人影都唔多個。我突然發現隊伍只有三個人，何亨呢? 原來佢就係坐咗喺茅坪嘅長椅，雙目緊閉。

「喂，好眼瞓呀，頂唔住呀!」

要知道，當時何亨係電台節目《為人民服務》主持，小弟只係節目助理，呢隻薯仔，small 到不能再small。從辦公室政治學嚟講，我雖然滿肚都係「爸爸媽媽哥哥姐姐」，但一句都唔可以講，只能夠一聲唔出，眼白白睇住時間一分一秒流逝!

呢次毅行結果點? 大家仲可以頂到去針山，當小師妹腳傷真係頂唔住要退出嘅時候，精力充沛、飲飽食醉嘅何亨一馬當先話:

「咁我要陪小師妹落山呀! 你哋自己行去終點啦!」

就係咁我同另一位同伴加快腳步，以47小時返到終點。

北潭凹甩底事件

講返轉頭，唔係因為工作關係，為勢所逼，加上年少無知，當年嘅我真係唔會同何亨編埋一隊參加毅行者。大部份原因係，之前聽過何亨唔少傳說。而眾多傳說裏，最為同事「津津樂道」，就係佢2000年左近負責支援隊嘅工作。

嗰時商台派出「18樓C座」監製黃德全隊伍，指示由何亨負責支援，並要求何亨到北潭凹送飯送水。結果，隊伍到達北潭凹發現何亨失踪，就打電話搵佢。點知，電話傳來嘅聲音係話:

「哎吔……Sorry 呀，瞓到而家先醒……」

(補番一筆，就假設隊伍係最早時間8點起步，去到北潭凹大概6個鐘，都要下晝點幾兩點。何亨竟然瞓到唔知醒……)

同事聽到咁，當然一手 cut 線，一腳衝向補給站食大會麵包。而何亨就到大埔道金山，先為隊伍送上原定要買嘅炸雞翼同可口可樂。

十八年後一條好漢

就係呢啲傳說以及個人經歷，令我呢十幾年裏面，一聽到行山活動有何亨，我都會要眉頭一皺。唔係驚要喺起點等佢幾粒鐘，就驚有人會中途嗌眼瞓。好彩後來從舊同事圈中，亦發覺唔到何亨再有踏上山頭。

直到大概兩年前毅行者，再喺麥理浩徑遇上何亨。嗰時佢雖然都係肥頭耷耳，但一身專業級行山友嘅打扮，頓然覺得佢成個唔同晒。之後再見佢參加咗兩次香港毅行者，仲聯同獅子山精神隊參加韓國毅行，已經唔係喺茅坪嗌眼瞓嘅「死肥佬」。咁2000年嘅何亨，同2018年嘅何亨，點解有咁大分別? 呢位毅行大叔，呢18年發生咗咩事呢?

記得舊年，我同佢行針山，途中問佢:

「你究竟係因為死過返生，定係因為生意失敗，還是畀女呃晒你啲錢，所以先搞到咁大轉變?」

結果行晒針草帽三座大山，佢都講唔到一個令人滿意嘅答案。