全香港咁多座山，但我偏偏對大帽山情有獨終，全香港最高既山，到底佢有咩好？
1. 風景變幻萬千
貴為全港最高峰，大帽山957米，天氣變化分分鐘快過女人變臉，天氣好既時候，除左可以睇到基本既日出、日落、星星等，更加有機會遇上雲海。除左天然景觀外，係四號觀景台更可以望到元朗錦田一帶，宏偉既大刀屻同雞公嶺就係面前，沿車路上山就可以睇到荃灣青衣一帶。
2. 多種路線
上大帽山有好多條唔同路線，有長線、短線，有好簡單既石屎路，亦都有需要一定體能直接鏟上去既山路，方便大家根據時間、體力、心情、天氣去選擇，而且大帽山既髮夾彎每一層都有捷徑方便上落(新手勿試)。
3. 交通方便
早上 : 可以係荃灣西鐵站或錦田上村總站搭51號巴士，比較麻煩既係，平日半個鐘至一個鐘先得一班車。
凌晨 : 家住錦田，試過幾次零晨時份搭的士去到荃錦坳巴士站(麥8終點)，怕鬼又怕拐子佬既我再自己一個女仔摸黑上山，後來有一次我行某座山發生過意外後，我唔敢再亂黎，我就選擇搭的士上到去停車場閘口果度。後來越來越懶，為左訓晏小小就會選擇日出前一個半小時先揸車出發去停車場。
4. 仙氣!! (食得太多白果發悔氣mode)
想體驗仙氣最簡單方法一定係上大帽山，大帽山經常入雲，濕度高達90%以上，所以係大帽(霧)山入面係保濕洗頭最佳方法。
最平民化路線
今次就同大家分享呢條最簡單最平民化既上大帽山短線，以後有機會再分享其他長線。呢條路線如果唔需要休息唔停低影相，正常速度慢行上山只需要1個半鐘就到達山頂禁區閘口。
搭51號巴士係郊野公園站落車，過馬路行去對面既巴士站，會見到有一個地圖指示牌。
沿樓梯上去會見到墳墓，繼續向前行然後轉左繼續上梯級，大概1-2分鐘後，就到達遊客中心，如果唔想再行梯級（呢度一直上去既15-20分鐘都會係梯級），可以轉右行車路斜路直上。
行10分鐘左右回頭望已經可以望到荃灣青衣一帶了，再行多10分鐘左右，抬頭望就會見到大帽山波波係眼前，繼續跟住波波方向行，然後會落一小段樓梯，就去到M153會見到野餐檯同有個涼亨。
沿車路直上，係右手邊會見到有個指示牌，可以入去大帽山最廣闊既4號觀景台。
係4號觀景台既草地行上去再轉左會見到一間荒廢小屋，落返黎就去到停車場閘口。如唔入去觀景台，繼續沿車路直上就會到。
望到警衛室穿過閘口直上髮夾彎，沿路會有好多捷徑可以唔洗咁樣一層一層兜黎兜去，但新手同天氣差既時候都係行返石屎路比較好，試過落雨行捷徑落山，臨掂地時成個人跣左落黎，比路過既踩單車人士扶返起身真係好尷尬。唔影相既話係4號觀景台開始慢慢行大約30-45分鐘就可以去到禁區閘口。
然後就可以沿路折返落返去荃錦坳。
下次再介紹繼續沿大帽山林道行既路線，會經過景色極壯觀既四方山再到達鉛礦坳，順便分享下我由大帽山行8個鐘返到公司既過程。
注意: 出發前自行評估自身體力狀況、經驗和裝備是否充足，大帽山部份路段沒有手機訊號，而且天氣變幻莫測，早晚溫度差異大，請準備妥當，安全至上。
更多：
Fitz.hk Facebook專頁
[行完食餐好] 5大海鮮團行山路線
[全港郊遊渡輪班次] 行山郊遊唔少得 (下)
Fitz Hiking 行山
