Fitz > 運動 Sports > 行山 Hiking > [行夜山之選] 頭燈定係電筒好?

識得行夜山 一定靠月光01Facebook一個自稱為初級嘅行山group(班會員其實好勁,一啲都唔初級 XDD),有位女行山友貼咗呢個帖:

[行夜山之選] 頭燈定係電筒好

「兩個女仔膽粗粗由東壩睇完日落再行出去搭巴士 (摸黑靠電話燈一路一路走)未識擔心及恐懼. 想起現在還想去一次……」

我山雞睇到呢啲留言,心生感觸。郊野嘅樂趣之一,就係充滿挑戰性。而所謂嘅挑戰性,並唔一定係攀繩上飛鵝山,或者係十幾呎高嘅山澗跳水。上面呢兩位妹妹嘅經歷,我真係完全感受到佢哋冒險所得到嘅樂趣。

講開又講,行山嘅照明工具,用手機照明當然係下下策啦。隨住行山用品舖啲頭燈越做越平,似乎頭燈已經成為行山界主流,不過我仍然係手電筒嘅忠實支持者。

摸黑煮飯,頭燈真係好用。但你幾時會黑媽媽煮飯?
摸黑煮飯,頭燈真係好用。但你幾時會黑媽媽煮飯?

頭燈:

  • 好處:輕便,照明之餘,可以騰出對手出嚟;只需要頭岳岳就可照到你睇嘅方向,唔使舉高對手,慳番啲力。
  • 壞處:箍喺頭上面,好熱;一個唔覺意,燈光會射到人,好乞人憎。

電筒:

  • 好處:更輕便,易收藏。照射方向範圍更廣(因隨手嘅郁動照射)。
  • 壞處:拎住行夜山都幾攰。
手電筒點都方便過頭燈
手電筒點都方便過頭燈

咁行夜山揀頭燈定電筒,真係各取所需,大家鍾意點就點,其實唔使拗。

不過,講到行夜山,我山雞就最鍾意乜都唔用。如果無乜雲,又唔係新月,單靠月亮嘅光線,其實當眼睛適應之後,係可以應付一般山路。當然,喺密林或者崎嶇山路,就要小心嘞。

其實呢兩位小妹妹,東壩返北潭涌根本就係馬路,下次可以利用月色照明,你哋會進入另一個意境。

更多:
[咁都拗] 行山用水袋定水樽?
[炎夏行山] 9件必帶消暑行山裝備
Fitz Hiking 行山


文章為作者意見,不代表Fitz立場。