Fitz > 運動 Sports > 行山 Hiking > [鄉郊發展] 亂丟煙頭罰千五 幾噸泥頭罰$16,000

2020年5月26日,環保署發出新聞公報,標題為「環保署成功打擊於新界具生態價值地點非法進行填土工程及棄置廢物」,內文話一名工程人員被控於「元朗甩洲非法進行填土工程及棄置建築廢物」(上圖),被判罰款$16,000。

不過諗諗,平民百姓街邊揼個煙頭,被捉到罰$1,500,10支煙頭分10次揼,就罰$15,000。反而大堆泥頭只罰$16,000,又真係幾經濟實惠。至於有無阻嚇作用呢? 大家自行判斷。

呢到咁多煙頭,一支1500,加埋應該十幾廿萬。

非法填土罪加一等

實際上,我哋對待「非法填土」呢類問題,用揼煙頭去類比的確係唔多啱數。街頭亂丟煙頭影響公眾衛生,當然要不得,不過「非法填土」影響更深遠,特別係喺漁塘及農地填土,簡直謀殺生態。

  1. 新界唔少養魚塘、農地,某些雖然已被棄置,不過亦已成為雀鳥及其他生物嘅棲息地,一受到破壞,就算罰多多錢都難以復原。
  2. 廢料傾倒破壞附近衛生環境,甚至會污染鄉郊溪澗、水源。附近地區更難發展農業。
  3. 新界鄉村傾倒泥頭情況嚴重,有團體相信係有關人士為咗製造既定事實,逼使政府將農地改為可發展地區,以加速在鄉郊建屋。長遠落去,新界郊野勢必大受破壞。

呢一類事件好靠大家互相監察,大家發現有鄉間非法傾倒泥頭情況,可向到各部門熱線投訴: 規劃署 (21586070);環保署 (28383111);地政署 (22313294)。

資料: 政府公告土地正義聯盟


文章為作者意見,不代表Fitz立場。