「夢想於漆黑裡仍然鏗鏘」可能已經聽到厭,但從來一啲都唔過時。我嘅夢想,每隔一年都要至少外出環島挑戰一次,提醒自己唔好被界定左嘅生活局限,提醒自己仍然要像21歲那年滿腔熱血地過每一日。

幸運地,身邊總會有一班痴線佬陪你癲,實行一次又一次嘅瘋狂之旅。每一次旅行/挑戰,都係一次成長、一次認識自己嘅機會,不斷在生命中成長,亦都係我嚮往嘅生活。

7日 301km 嘅環島眨眼就過,太多回憶唔可以一一記得清楚,唯有留低文字&照片,記住呢段熱烈日子。今次旅程,最大挑戰都莫過於負重 (5-6kg)、「烈陽神功」&平均 45-50km 一日。老土啲講句,儘管眼前難關有幾難過,興幸有你地4位隊友沿途互相支持。每一個人,能力各有高低在所難免,但係整個旅程當中,大家都有一個自己嘅身份,缺少任何一個,旅程都未必咁完美。就算每日嘅行程都受到不同嘅影響而要作出變動,但五個人一條心,「只有解決到問題嘅人,沒有解決唔到嘅問題」。


整個旅程印象最深刻就係 Day7 最後一日,當大家係過去六日已經攰到接近臨界點,知道最後一日只係淨返42k(只不過係一隻全馬)嘅時候,無論腳幾痛、肌肉幾崩緊、意志被蒸發得一乾二淨,都一齊堅持到最後,沿路互相鼓勵、幫助、打氣,當返到「最初的起點 – 那霸市役所」,就知道大家呢7日嘅堅持都係值得。#就算過程幾難挨 #身邊總會有幾個 support 陪你走過 繼台灣之後,又同李盛再取下一島。成功同 Arthur、達仔、Yvonne 完成人生第一次環島,係完成一刻大家相擁而至,係一種無價嘅滿足感。

(左起) Arthur、Yvonne、盛、宗、達仔

想與你地說的話

李盛

唔經唔覺同你呢一年半做過無數次 partner,環島、旅行、Ultra marathon、Marathon、100km Race。今次完成環沖繩一刻,一年半前嘅環台回憶,所有甜酸苦辣一次過湧曬出黎「自己的生活係由自己創造,回憶是留給願意踏出第一步的人」。興幸人生中有你呢個 partner 伴著走去做一啲瘋狂計劃。要有一個無所謂嘅 partner 去無條件陪你做傻事,其實好難搵! 期待與你的下一個島。

Arthur 飛龍

整個旅程嘅士氣振作者,當大家每日完成一個全馬距離之後,你都可以運用你獨有嘅智障優點,去為大家帶黎無比歡樂,令每日嘅生活增添多一點色彩。完成一刻,我見到你眼泛淚光,但又忍住唔喊出黎,我想講句「Proud of you」,對於一個只係練左一年跑,最長只係跑過半馬嘅人黎講,你真係好勁!

達仔

18歲 DSE 嘅畢業生,希望今次能夠帶比你一個難忘嘅 grad trip。一年前,你同我講話想一齊去環島,當初以為你下巴輕輕,講一、兩個月就算,點知最後真係實現左你自己一年前定下嘅目標。最開心嘅就係,係短短嘅7日裡面,我睇到你嘅成長、你嘅改變,由頭兩日冇自己嘅計劃、冇乜點為明天打算、決心唔夠、容易放棄;去到最後嘅兩日,你會因應自己嘅身體情況揀選最快最合適嘅 recovery 方法,見到斜路唔會即刻停低,努力嘗試挨到3km後嘅斜路頂,會去主動關心、照顧別人。因為見到你嘅成長同轉變,由心而發感動就黎。(想當初18歲嘅我仲係渾渾噩噩咁生活) 今次你嘅成長,定必終身受用! 更期待嘅係,你能夠用今次嘅經歷去感染更多人。

Yvonne

由邀請一刻,我只不過當係一個說笑,因為聽完件事都覺得變態,但你嘅第一個反應竟然係即刻應承左(成件事係出發前四日發生),非常佩服你嘅勇氣,亦都相信你唔係一個信口開河嘅人,真心覺得你好癲! 旅程當中,你每日都係 7×24 咁照顧著我地 (切埋生果比我地食,爭在未餵埋入口),減輕左好多精神上嘅負擔,又會幫我地按摩、搵 support 點、影靚相,仲要就住我地嘅速度去踩單車,仲辛苦過連續踩3、40km。係女仔當中,你嘅獨立能力真係無人能及。

最後想講嘅係「夢想這條路踏上了,跪著也要走完」短至一個環島旅行,長至一個人生,亦因如是

最後最後,又一次挑戰成功,要多謝支持嘅  ASICS 、Round The World 優遊天下

  • 2016年9月7-30日 環台跑 916km with 李盛
  • 2017年1月2-14日 四國單車環島 764km with 鄭仔、榮仔
  • 2017年4月9日 跑步登上武嶺 54km 3585m with 李盛、Angus
  • 2018年5月17-25日 沖繩環島 301km with 李盛、Arthur、達仔、Yvonne

Gear support: ASICSRound The World 優遊天下

2016年9月環台文-《沒有夢,就一直飛不起
待續..《五個人第六個隊友的環島》

攝於2016年10月環台

HNR 跑步團隊 Facebook 專頁

Fitz 連結: https://fitz.hk/?p=95162


更多:
Fitz Facebook專頁
[HNR沖繩環島跑] Day 7 恩納 > 那霸 累積301公里
[HNR沖繩環島跑] Day 6 美麗海水族館 > 恩納村
[HNR沖繩環島跑] Day 5 國頭村 > 古宇利大橋 > 美麗海水族館 205/360 km (56.9%)
[HNR沖繩環島跑] Day 4 名護市 > 國頭村 158/360 km (43.8%)
[HNR沖繩環島跑] Day 3 宜野座村 > 名護市 125/360 km
[HNR沖繩環島跑] Day 2 與那原町 > 宜野座村 100/360km
[HNR沖繩環島跑] Day 1 那霸市 > 南城市 48.6/360km
[HNR沖繩環島跑] Day 0 十條腿跑遊闖沖繩360km
Fitz Running 跑步


文章為作者意見,不代表Fitz立場。

歡迎投稿: https://fitz.hk/contribute/

廣告